U MP ka Tura konstiwensi u Saleng A Sangma mynta ka sngi ula leit ban aiti ia ka shithi iehnohkam kum u MLA ka Gambegre ha u Commissioner & Secretary ka Iing Dorbar Thawain ka jylla.
Haba kren sha ki lad pathai khubor u Saleng ula ong ba kum u MP un ai ka jingshakri katba lah da la bor bad un ai ka jingshakri kaba paka kaba 100 percent sha ki paidbah.
U Saleng u la ong ba mynta ka kamram jong u kum u MP ka long ba un leit ban iasaid ia ka jingeh ki paidbah Garo bad ka jylla hi baroh kawei.
Haba kylli halor ka Inner Line Permit, u Saleng u la ong ba um lah ban kular ban pynioh beit ia ka ILP hynrei un pyrshang ban kren halor kane bad un tynruh ruh ban pynrung ia ka ktien Khasi bad ktien Garo ha ka khyrnit ba phra jong ka riti synshar ka ri.
U Saleng ula ong ba mynta ka lah ban plie lad na bynta ban iasaid ia ki mat ka jylla namar ba ka BJP ka khlem ioh marwei ia ka jingbun paid ha Iing Dorbar Parliament bad ka nym lah ban lehmon.
Haba kylli halor ka Citizenship Amendment Act, u Saleng u la ong ba kum ka party kan iakren ban wanrah ka jingpynkylla ne ban pynllait noh na ka jingpyntreikam ha kane ka jylla.
“Watla ka ILP mynta ka la dei ka sobjek jong ka sorkar pdeng, hynrei ngan iakhun katba lah bad ngan tynruh ruh ban pynrung ia ki ktien ka jylla ha ka khyrnit ba phra jong ka riti synshar ka ri India. Nalor kine, ngan iasaid ruh halor ki ishu kynthup ka jingbymioh kam, ki kam bamsap bad ka jingjur u drok ha kane ka jylla,” ong u Saleng.
Halor ka jingkren jong u MLA ka NPP u Rakkam A Sangma uba la ong ba ki MP thymmai ka jylla kin nym lah ban iasaid ia ki jingeh ka jylla, u Saleng u ther ia kane ka jingkren da kaba ong ‘ Nga dei u Saleng ngam u Rakkam’.
“Ka jinglong bad ka jingpyrkhat jong nga ka iapher na u Rakkam,” ong u Saleng.
U Saleng u la ong ba kum u MLA la san snem marwei ula shong ha ka liang pyrshah hynrei mynta ki don ki paralok ba shong lang ha liang pyrshah kan nym don jingeh.
“Ngam sheptieng namar la san snem nga la shong ha ka Liang pyrshah marwei kum u Independent bad mynta nga don ia ki paralok bad ngam iohi ba kan don kano kano ka jingeh,” ong u Saleng.
