Ha ki snem ba la dep, palat 100 tylli ki seng treimon sngewbha ne ki 100 NGO, kynthup ia ka Centre for Policy Research (CPR), Rajiv Gandhi Foundation, Rajiv Gandhi Charitable Trust ia kaba la khlieh da ka president barim ka seng Congress ka Sonia Gandhi bad Rahul Gandhi bad Oxfam India, ki la duh noh ia ka license na ka bynta ka Contribution Regulation Act (FCRA) namar ka jingshah kynnoh ba la pyndonkam bakla ia ka pisa ba la phah na bar ri. Ka sorkar India dang shen ka la buh seng treimon sngewbha na US, ka Campaign for Tobacco-Free Kids (CFTK), hapoh jong ka kyndon treikam ka prior reference category (PRC) – kaba pyni ba kino kino ki jing noh synniang na bar ri ha India donkam ban da leh shwa ia ka jingtih bniah bad jingpynshisha bad dei ban ioh ia ka jingmynjur na ki bor pyniaid ha shwa ban pyndonkam ia ka. Ka tnad ki kam pohiing ka sorkar pdeng ka la pynpaw ba ki seng treimon sngewbha kiba na kane ka ri ki don ka jingshah ktah na ka bynta ki karkhana kiba shna ia ki duma, bad kane kadei kawei na ki daw ban shah pyrkhing noh ka jingbei tyngka na ka bynta ka CFTK. Ia ka CFTK la bei tyngka da uwei na ki riew pawkhmat ka ri America bad uba long ruh u mayor barim ka New York City, U Michael Bloomberg. Kane ka shnat ka ai ka jingkyrshan ha ka liang ki ain, ka jingpynsaphriang khubor bad ka jingwad bniah sha ki sorkar bad ki kynhun treimon sngewbha ha kylleng ka pyrthei bad iarap ia ki ban kyntiew, ban wanrah ia ki lad treikam bad ban tehlakam ia ka jingpyndonkam ia ki duma.
Dang shen la mih ki jingthoh ba kawei na ki seng treimon sngewbha ne ka NGO kaba la iatreilang bad ka CFTK, ka Voluntary Health Association of India (VHAI), la lap ba ka la pyndonkam bakla ia ka FCRA & bad ia ka license ba kin treikam la shah knieh noh ha u bnai Lber mynta u snem da ka tnad ki kam pohiing ka sorkar pdeng. Lada kino kino ki seng treimon sngewbha ki noh synniang pisa donkam shwa ban iaid lyngba ki kyndon ban ioh ia ka jingmynjur ne ‘prior permission category’, la khang ban bei tyngka ia kino kino ki seng treimon sngewbha khlem da ioh ia ka jingmynjur na ka sorkar. Ha u bnai rymphang mynta u snem, ka VHAI ka la pynlong ia ka rynsan iamir jingmut ne ka National Conference on Tobacco or Health ha kaba bun ki phang la iakren naduh kaba iadei bad ka ioh ka kot ha kaba pynmih ia ki duma bad kumno yn tehlakam ia ki ha India, kumno ban wanrah ki bor synshar ban tehlalam ia u duma, ka mariang sawdong sawkun, bad ka jingpynmih ia ki buit treikam digital na ka bynta ban the lakam ia u duma.
Ha ka snem 2017, sa kawei pat ka seng treimon sngewbha ba paw bha jong ka ri US kaba dei na ka kynhun khristan, ka Compassion International (CI), ka la hap ha ka thup jong ka ‘prior permission category’. Ha katei kajuh ka snem kawei na ki seng treimon sngewbha ba la seng da u Michael Bloomberg, uba long uwei na ki riew pawkhmat, ka la shah buddien ha ka tnad ki kam pohiing ka sorkar pdeng namar kidon ki jing shah kynnoh ba kane ka seng ka la pynlong ia ki jingialap paidbah pyrshah ia u duma da kaba iatreilang bad suh buit bad ban ialeh pyrshah ia kane ka bynta. Ia ka license jong ka FCRA la ai da ka tnad ki kam pohiing sha ki NGO bad ki shnat kiba trei na ka byntaban pyrkhat ia ki kam bad ki kyndon na ka bynta san snem bad ia ka aplikashon jong ki yn sa buddien bad bishar biang man la u snem lyngba ka jingioh pdiang jingbei tyngkat na bar ri na ka bynta ki kam kiba thmu ban leh. Kino kino ki jingpyndonkam bakla bad ka jingpyniaid bakla shawei shawei ia kane ka pisa da kine ki NGO la khein ia ki ba ki long kiba pynkhein pyrshah ia ka FCRA Act, ong ki heh ophisar.
