U MP ka Shillong Parliamentary konstitwensi u Dr. Ricky Andrew J Syngkon u la ong ba um sngew pher lada don ha ka liangpyrshah ne ha ka liangsynshar namar kum ki shakri paidbah, kin hap ban shakri ia u kynrad uba dei u paidbah. “Kam da dei eh ban ieng ban don ha ka liangsynshar ne ha ka liangpyrshah, ban ieng marwei lei kan long kaei kaei kaba sngew sarong ban rah ia ki mat ba ka jaitbynriew ka donkam. Ngi don 24 tylli ki mat bad kito ki mat ngan rah bad ngan kren ia ki”, la ong u Dr. Ricky. U la bynrap, “Kiba don ha ka sorkar ruh ki dei ki shakri ki paidbah, kiba don ha ka liangsynshar ruh kiba shakri paidbah, ka kamram u shakri ka long ban trei na bynta ki kynrad (u paidbah)”.
U la ai khublei ia ki paidbah kiba la jied ia u ban leit iasaid sha Parliament bad ula ai nguh ia u Blei uba la ai ia u kane ka lad. “Nga ai nguh ia u Blei ba la ai nga kane ka lad, bad ka jingkyrshan jong u paidbah ban ai ka jingjop ia ka VPP ha ka elekshon MP ba la dep. Ka dei ka kam kaba nga shim kum ka rai rangbah na ka daw ka jinglong jingman ka jylla, kaba la pyllong ia nga ban ym lah shah kum u nonghikai namar nga don ki shkor, ki khmat, ki kjat bad ka jingpynkhih ia ka dohnud jong nga. Kum u nonghikai nga shim ia ka jingkitkhlieh na ka bynta ka lawei”, la ong u Dr. Ricky haba kren ha kane ka sngi Saitjain.
U la ong ba um sngewlong marwei namar ba u don u Blei uba u shaniah bad ka jaitbynriew kaba ai ka jingshaniah. “Ngam ju sngew long marwei namar ba nga don u Blei ba nga shaniah bad ka jaitbynriew kaba ai ka jingshaniah. Ka jingkren ba nyngkong jong nga ha Parliament, nga ieng ban kren ia ki nongrim jong ka jaitbynriew, ia ka jinglong ka synshar khadar, kaba la synjor katkum ka riti synshar ka ri India. Ngan ieng ban iai kren bad kyrmen ba ka jingdon ka VPP kan long ka tyndong jingsawa ia ka ri India bad ngi kwah ban iohi ia ka ri India kaba kiew kumba la angnud u PM u Modi ha 2047 hynrei ngim lah ban poi sha kata lada ngim burom iwei ia iwei bad ia ki rit paid”, u la ong.
