U Myntri Rangbah ka jylla u Conrad K Sangma hynne ka sngi ula sdang ia ka sienjam ban kyrshan ia ki khynnah pule, nonghikai bad ki kmie ki kpa kum shibynta ban kyntiew ba kan don ka jingpass bha ki khynnah pule da kaba pyniaid shakhmat ia ka CM IMPACT na ka bynta ka rilum Garo. Kum shibynta jong ka CM IMPACT, ka tnad pule puthi kan ai ia ki Guidebook ia ki khynnah pule, nonghikai ka ban long ruh ha ka dur jong ka App ka ban don man la ka por ka Updates bad yn pynbiang ruh ia ka Internet ha ki Block ban pynsuk ha ka rukom pyndonkam. U Myntri Rangbah ula ong, ba ka long kaba kongsan ba kiba donbynta baroh ban iakynduh man la ka por ban iakren bad ban pynkhreh man la ki por ia ki lad ki lynti ban shimkhia ia ki jingeh ha kaba iadei bad ka pule puthi. “Ngi hap ban law ia ki jyrwit jyrwat bad ban iaid shakhmat da kaba buh ia ka thong. Ngi la don ia ka jingthmu ban pynbha ia ka pule puthi bad ka jingthmu ka long ban kyntiew ia ka kyrdan bad ban pass bha ki khynnah” ong u Conrad.
Ula kyntu ia ki nonghikai ban shimkhia ia katei ka mat bad ban weng ia ki jingeh ban kyntiew ia ka jingpass bha ki bad ka kyrpad ia ki nonghikai ba kin khmih bniah bad ban lap ia ki jingduna ki jongki khynnah bad ban trei ban pynbha ba kin lah ban ioh mark bha. U Conrad ula kyntu ruh ia ki nonghikai ban pynlong ia ki khynnah kiba la pynkhreh ba kin lah ban pass ia ki eksamin khamtam haba man la ki eksamin ki don ia la ki jong ki rukom buh jingkylli kumta ki nonghikai kidei ban pynkhreh ia ki khynnah pule ba kin long kiba la pynkhreh bha ialade. U Myntri Rangbah ula ong, ba ka sorkar kala rai ban pynlong ia ka supplementary examination hapoh 2 bnai ba la dep pynbna paidbah ia ka Secondary Result ka long ban ailad ia ki samla pule ba kin lah ban pyndep ia ka eksamin ka jongki khlem da pynlehnoh ei shi snem.
Katba u Myntri ka pule puthi u Rakkam Sangma ula pynpaw ia ka jingeh jong ka jingdon ki ‘proxy teachers’ bad ula kyntu ia ki nonghikai ban batskhem ia ka nongrim ka jongki ban ai ka jingkular ban shakri ia ka imlang sahlang bad ula kyntu ia ki nonghikai ban shimkabu ia ka jingmih jong ki kor teknoloji bad ban pyndonkam ia ki na ka bynta ban ai ka jinghikai kaba biang bad kaba ai ruh ia ki jingtip bapher bapher. U la ong ruh ba ki don palat 55,000 ngut ki nonghikai ha ka jylla hynrei ka kyrdan ha ka rukom ai jinghikai kam pat long kaba biang. Kum ka sorkar, ka dang ialeh ban kyntiew bad pynbha ia ka rukom ai jinghikai ia ki khynnah pule ha ka jylla.
