Ngi hap pyntreikam ia ka ain ‘No Vendor Zone’ namar ka buh jingeh ia ki paidbah khamtam ka por long skul: Ampareen

Ka Myntri Sorkar ka Kong Ampareen Lyngdoh kaba dei ruh ka MLA jong ka East Shillong Constituency ba kynthup ka Laitumkhrah ka la pynksan ia ka jingthmu ban kynriah ia ki nongdie madan sha Veronica Lane. Haka jubab halor ka jingpyrshah ia ka jingai jaka ia ki nongdie madan ha Veronica Lane Laitumkhrah, ka Kong Ampareen ka la ong ba kan iai pyrshang ban wad ki lad lynti ban weng ia ki jingeh ki nongleit nongwan khamtam hapoh ka thain Laitumkhrah. Ka Kong Ampareen ka la ong ba ka long kaba donkam ban don da ka ‘No Vendor Zone’ lane ym shah ban shong die madan namar ka jingdon ki nongdie madan ha man ki surok bad ki lynti syngkien ka buh jingeh ia kiba iaid ba ieng khamtam ha ka por long skul.

“Ka ‘No Vendor Zone’ lane ym shah ban shong die madan, kam dei ba kren ka Kong Ampareen shimet hynrei hynrei ka don ruh da ka Act” la ong ka Kong Ampareen.”Ngi hap ban pyntreikam da ka ‘No Vendor Zone’ bad kane kam dei kaba nga ong shimet. Ka don ka Act kaba la kren shai. Ym donkam iano iano ban kren pyrshah ia nga ha surok. Kam pher ki kren aiu hynrei ngan pyrshang ban pyntreikam ia ka Act” ka la ong.

Ka Kong Ampareen ka la ong “Lada nga lah ban leh ia kane kum ka MLA kaba shah kynthoh bun jait. Ngam tieng bad ngam kynran dien satia ban weng ia ka jingeh ki nongleit nongwan namar ka jingshah knieh ki surok bad ki lynti synkien”. Ka Myntri ka la ong ba kam lah ban long ba baroh ki kynhun kin don ka jingiasngewthuh jingmut bad ka la kyntu ia baroh ban iatreilang ban pynbeit halor kane.