U Myntri Rangbah ka Jylla u Conrad K. Sangma ha ka sngi Saitjaiñ ula plie ïa ka Vocational Training Institute ka Synod College, Shillong kum ka jingrakhe ïa ka diamond jubilee jong kane ka kolej. Haba kren ha kane ka sngi, u myntri rangbah ka jylla ula iaroh ia ka Synod College halor ki sien jam bapher bapher kiba la shim da ka kolej ha kine ki phew snem ba la leit noh. Ula ong ba ka kolej ka la pynlong ïa ki seminar, ki jingïalang bad kiwei kiwei ki kam, bad ki la ai jingmut sha ka jylla halor ki jingeh bapher bapher ha ka imlang sahlang.
Haba pynkynmaw ia u kpa jong u (L) P.A. Sangma ia ka jingiadei jong u bad ka kolej, u myntri rangbah u la ong, “Ka long kaba donkam ba ngin pynkup bor ia ki jingmut jingpyrkhat ki samla jong ngi. Ki kam bad ki jingiarap bapher bapher ba la shim da ka kolej ki dei ban pynwan dur ia ka jingmut jingpyrkhat jong ki samla. Ngi dei ban trei da ka jingmut jingpyrkhat ban sei ia ki samla donsap.” Haba kyrpad ïa ka kolej ban shim kabu ïa ka Meghalaya Skills Programme, u myntri rangbah ula pyntip ba ki seng bapher bapher ha ka jylla ki la iateh bad ka sorkar na ka bynta ban ai jinghikai ïa ki kam ki jam.
U la ong ba ka dei ka jingjop namar ba ka sorkar ka la sdang ia ka mishon ban pynkup bor ia ki samla. “Ka jingkwah ka Meghalaya Skills Programme ka long ban ai jinghikai ha ki kam bapher. Ngi pynshlur ïa ki institute bad kolej ban ïatreilang bad ka sorkar bad ban ai jinghikai ïa ki samla donsap,”ula bynrap.
