Noh synniang ka KSU da ka iing ia ka kong Regina Jyrwa

Ka Khasi Students Union (KSU) mynta ka sngi ha ka jingkynjoh ia ka jingiaid lynti 46 snem, ka seng ka la lah ban aiti ia ka iing sha ka kong Regina Jyrwa kaba shong ba sah ha Mawlai Nongkwar Block-10. Ia kane ka iing la aiti da u General Secretary ka KSU Sengkmie  u Samla Donald V Thabah ha ryngkat ka jingdonlang ki dkhot ka KSU, u Rangbah  Shnong ka Mawlai Nongkwar u bah Moon Rumnong, ki nongialam shnong, ki Nongïalam na ka Seng FKJGP bad kiwei kiwei. Ka Kong Regina Jyrwa ka dei ka longkmie kaba wan na ka longing kaba duna ka ioh ka kot kaba ju im sngi da kaba bylla sngi ban pyndap pynbiang ha iing ha sem.

 Ia kane ka iing la  iarap ban pynshna da la KSU mawlai circle bad ia ka jaka la ai sngewbha da ka kong Streamlet Kharbhih. U bah Donald Thabah haba kren ha kane ka sngi, u la ong ba kane ka iing ba la tei da ka Mawlai circle kadei ka sakhi ba ka seng ka trei na bynta ka jaitbynriew namar watla ha i bor barit bad ryngkat ka jingiatreilang ki la lah ban tei ia kane ka iing. U la ong ba ia ka KSU la seng ha ka nongrim ba ki samla kidei ban ioh ia ka hok khamtam haba iadei bad ka pule puthi. U la ong ba ka seng ka la trei bun bah ki kam bad ka la iakhun ia kiba bun ki ishu ka jylla hynrei kam ju kwah ban put turoi ialade.

U la ong ba bun ki briew ki kynnoh ba ka KSU kadei ka seng pynkulmar shnong, namar ba ka seng ka iakhih na bynta ban iada ia ki samla ka jaidbynriew. Na ka liang ka kong Regina ka la pynpaw ka jingsngewkmen bad ka  jingsngewnguh ia ka KSU kaba la lah ban pynshna ia ka iing. Ha kajuh ka por ka la pynpaw ka jingsngewnguh ia ka kong Streamlet Kharbhih kaba la ai sngewbha ia ka jaka ban shna ia kane ka iing.