Shibynta ban snohkti lang ha ka jingrakhe ia ka National Voluntary Blood Donation Day, na ka liang ki bor pulit ka Ri Bhoi District, lyngba ka ophis u Superintendent of Police bad ka Nongpoh Police Station ki la shimbynta ban leit ai ia ka snam ha Nongpoh Civil Hospital Blood Centre.Ia kane ka jingiashim bynta ha kaban leit ai snam sngewbha, la lamkhmat da u Jagpal Singh Dhanoa, Superintendent of Police ka Ri Bhoi District, u Michael Marak, Officer Incharge ka Nongpoh Police Station, u Rubul Ali Traffic Incharge nalor kiwei kiwei ki pulit Officer.
U Michael Marak, haba ai jingkren u la pynpaw ia ka jingkmen ban ioh ia shimbynta ha kaban ai snam sngewbha kum ka dak ban ai mynsiem ia kiwei ki riew paidbah ban wan shakhmat ban ai sngewbha ia la ka snam na bynta ka jingmyntoi ha kaban ai jingim ia kito ki briew kiba donkam snam kyrkieh. U la pynpaw ruh, ba ka jingshimkhia jong u Superintendent of Police, ka Ri Bhoi District, ka long shisha kaba donkam bha ba kum ki bor pulit ruh kin don ka bynta kaba khraw ha kaban ai snam na bynta ka jingdonkam kaba kordor ha kaba ia dei bad ka jingdonkam ia ka snam, u la khot la wer ia kiwei kiwei ki riew paidbah ban wan shakhmat ha kaban ia snohkti lang ha kum kane ka jingai sngewbha ia ka snam.
Shuh shuh ruh, u la ong, ba ki don bun bha ki briew kiba syier ne sngewthuh bakla ba ka jingai snam kan ktah ia ka Koit ka Khiah jong kito kiba ai snam, hynrei kane kam dei ka jingshisha, namar ka jingai snam hi ka iarap pynban ia ka Koit ka Khiah ia kito kiba ju ai snam man ka por bad kam don kano kano ka jingktah ia u ne ka ba ai snam.
