Kum shibynta ban iarap ia kiba pang ba shitom ha ka thain u Lat ka jylla u Phagu Chauhan ula noh synniang da ka kali kit nongpang (ambulance) sha ka Seva Bharati Meghalaya bad ia kane ka kali ula pyllait paidbah ha ka jingialang barit ha Raj Bhavan hynne ka sngi.
Ka jingnoh synniang ka long ka jingmyntoi ia ka kynhun, ki pynpaw ka jingsewnguh ia u Lat ka jylla uba la koi ban iarap da ka ambulance ka seng.
Ha ka jingialang ban ai ti ia ka ambulance la donlang u Principal Secretary jong u Lat u Harish Chandra Chaudhary ryngkau ki ophisar bad ki nongtrei ka Raj Bhavan, Shillong, bad ki dkhot ka Seva Bharati Meghalaya.
Ka Seva Bharati Meghalaya ka dei ka kynhun treimon sngewbha kaba la ithuh da ka sorkar jylla katkum ka Meghalaya Societies Registration Act 1995. Ha ki 18 snem ka la trei bun ki kam ha baroh ki district ka jylla Meghalaya, halor ka koit ka khiah bad ka pule puthi bad ka pynlong ia ka vocational training, kumjuh ka riti dustur bad ki national integration prokram.
