Palat 1 klur ngut la peit bniah ia ki briew na ka jingpang Sickle Cell hapoh ka NSCAEM

Ka Tnat ka Koit ka khiah jong ka Sorkar Pdeng ka la tam ia u mawmer ba kongsan. Ladep ban screen palat 1 klur ngut ki briew na ka bynta ka jingpang Sickle Cell hapoh ka National Sickle Cell Anaemia Elimination Mission.

Ka Mission ka thmu ban screen 7 klur ngut ki briew ha ki 3 snem. Ka jingpang Sickle Cell kadei ka jingpang ba iadei bad ka snam kaba hiar pateng kaba ktah ia ka jingim jong u briew ba ioh ia kane ka jingpang.

Kane ka jingpang ka kham don bha ha ki jaitbynriew riewlum jong ka ri hynrei ka lah ruh ban don ha ki briew ki bym dei ki riewlum. Ia ka National Sickle Cell Anaemia Elimination Mission la plie da u Myntri Rangbah duh ha ka 1 tarik Naitung 2023 ha Shahdol, Madhya Pradesh.

La sdang ia ka prokram ha ka rukom treikam mission mode na ka bynta ban screen, ban shim ki lad jingiada bad ban tehlakam ia ka jingpang sickle cell anemia ha baroh ki jaitbynriew riewlum bad ha kiwei kiwei ki jylla/UT jong ka ri ba bun ba ioh ia kane ka jingpang.

Ka jingphaikhmat kyrpang kalong ha 278 tylli ki distrik jong 17 tylli ki jylla ba bun ba ioh ia ka SCD kum ka Gujarat, Maharashtra, Rajasthan, Madhya Pradesh, Jharkhand, Chhattisgarh, West Bengal, Odisha, Tamil Nadu, Telangana, Andhra Pradesh, Karnataka, Assam, Uttar Pradesh, Kerala, Bihar badUttarakhand.