Palat 14 lak kin thep vote ha Shillong, 8 lak ha Tura Parliamentary

Ka jingialap elekshon MP sha ka Lok Sabha ha kane ka jylla ka la kut noh mynta ka sngi bad ka rai kaba khatduh mynta kan long bad kan shong ha kti u paidbah ha ka 19 tarik iano ki ibit ban jied ban long nongmihkhmat sha Iing Dorbar Thawain ka ri.
Ha kine ki sngi baroh ki Kyrtong bapher bapher ki la pynsngew ia la ki nongrim bad ka jingialap ka la long kaba shongshit bha.
Ka Shillong konstitwensi ka don 14 lak ngut tam ki nongthep vote katba ka Tura konstitwensi ka don kumba 8 lak ngut eiei.
Ki don 21 hajar tam ki nongthep vote kiba leh da ka postal ballot bad haduh mynta ki don 6 hajar tam kiba kwah ban thep na la iing khamtam kito kiba la kham iaw rta bad kane ka jingthep vote da ka postal ballot ka sdang naduh ka 8 tarik bad kan kut ha ka 13 tarik.
Na ka jingialap ilekshon, kiwei ki kyrtong ki la ther ia u bah Vincent H Pala namar ba um leh eiei ia ki mat ki jura ka jaitbynriew kum ka jingiasaid ban pynrung ktien Khasi ha ka khyrnit ba phra, ka jingkyntait jong u ban kyrshan ia ka Inner Line Permit, bad kiwei, hynrei na ka liang ka Congress ka la ther kylla, ba kiwei ki party kim ym lah ban leh eiei namar ba ha Parliament kaba don 543 ngut ki MP, marwei kim lah thaw pyrthei, bad dei tang ka Congress kaba lah ban iasaid ka ban jop shibun ki MP.
Ki kyrtong jong ki seng riewlum kum ka Regional Democratic Alliance (RDA) bad ka Voice of the People Party (VPP) bad wat ka NPP kaba kyrshan ka BJP, ki la pynsngew ia ki nongrim ba ki ieng na bynta iada ia ka jaitbynriew kum ka Inner Line Permit (ILP), pyrshah ia ka Uniform Civil Code (UCC), bad kumjuh ia ka Citizenship Amendment Act (CAA) bad ka jingpynrung ia ka ktien Khasi ha ka khyrnit ba phra.
Katba ka Congress ka la ban jur ia ka jingma ia ka jingioh mane laitluid ha ka jingsynshar ka BJP.
U kyrtong shimet u Prof. Lakhon Kma, u ban jur ban pynkylla dur ia ka Meghalaya lyngba ka ioh ka kot, ka pule puthi, ka koit ka khiah.
La jan baroh kiba ialeh ia ka elekshon, ki don ki jingrwai ban kynhoi kynkiw, ban iawer bad pynshongshit ia ki kyrtong ban pan jingkyrshan na ki paidbah.
Ha kine ki lai snem tam eiei, ia ka Shillong Parliamentary konstitwensi, la jop lynter 15 snem da u bah Vincent H Pala na ka party Congress.