U Myntri ka tnad Social Welfare u bah Paul Lyngdoh mynta ka sngi ha Iing Dorbar, ula iathuh ba ki don kumba 3 lak ngut ki briew kiba kyrni ha ka jingdih droks ha kane ka jylla. Haba jubab ia ka jingkylli ba la wanrah da u MLA ka Mawryngkneng u bah Heavingstone Kharpran, u bah Paul ula ong ki don kumba 5 lak kiba kyrni dih droks ha ka jylla bad ula bynrap ba tang ha West Jaintia Hills ki don 272 ngut kiba leit shah sumar ha ki snem naduh u 2020-24. Ula ong na ka liang ka sorkar hapoh ka DREAM Mission ka la pynkhreh ban thaw shuh shuh ia ki jaka ban ai jingsumar ia kiba kyrni dih droks ha kylleng ki district ka jylla. Na bynta kane ka DREAM Mission, ka sorkar jylla na bynta snem 2021-2022, ka la ioh pdiang T.1.30 lak na ka sorkar pdeng , la ong u bah Paul haba jubab ia ka jingkylli bynrap ba la buh da u MLA ka Nongkrem u bah Ardent Miller Basaiawmoit. Ula ong ba ka sorkar na bynta ban iakhun bad khanglad ia u drok, ka sorkar ka la mang T.50 klur hapoh kane ka skhim na bynta san snem ban iakhun ia ka jingjyllei u droks ha kane ka jylla.
“Ngi la iaid shakhmat ban thaw ia ki jaka ai jingsumar na bynta ki kynthei bad Shynrang ha kylleng ki District ka jylla,” ula ong.U Myntri ula iathuh ba haduh mynta ki don 10 tylli ki jaka ban ai jingsumar ia ki briew kiba kyrni dih droks ne ki Rehabilitation Centre ha ka jylla. Ula iathuh ba kawei ka centre la iarap da ka tnad Social Justice & Empowerment jong ka sorkar India bad 3 tylli la pyniaid da ka sorkar. U Myntri ka tnad Social Welfare ula iathuh ba ha East Khasi Hills ki don san tylli baroh ki Drug Addiction Rehabilitation Centre ba la bei tyngka da ka sorkar jylla. Kine ki kynthup ka Kripa Foundation De- Addiction centre na bynta ki khynnah shynrang ha Mawkasiang, KJP New Hope De Addiction na bynta ki kynthei ha Mawkasiang, New Life De Addiction Centre na bynta ki shynrang ha Mawtawar.
Katba ki centre ba la bei tyngka da ka sorkar pdeng, ki kynthup ka New Hope na bynta ki shynrang ha Mawkasiang bad ki centre ba la pyniaid da ki riew shimet ki kynthup ka Sanker mawlai mawroh. U bah Paul u la iathuh ba ka jingjop na bynta ban iakhun pyrshah ia u droks ka la kot sha ka 20 percent bad kane ka long katkum ka kaiphod ba la lum na ki tnad kynhun shimet bad ka tnad sorkar.
