Ka tnad Civil Defence bad Home Guards ka la rakhe ia ka 61st Raising Day ha CTI Parade Ground, Mawdiangdiang, Shillong bad la sam ia ki khusnam bapher sha ki pulit Civil Defence bad Home Guards ka jylla.
Haba kren kum u kongsan u Myntri ka tnat Civil Defence & Home Guards, u Bah Comingone Ymbon ula ong, ka tnat Civil Defence & Home Guards ka la leh ki kam ba khraw ban iarap haba don kino kino ki jingjia bad khamtam ha ka por lynshop ka bor mariang ne ka jingjulor ba leh da ki briew bad ula ai ka jingiaroh ia ka jingtrei shitom ki Home Guards ban pyniaid ia ki kali, ban pahara ha Assembly Complex bad ban pahara ha ki Puja Pandal ha ka por puja.
U la bynrap ka Civil Defence & Home Guards, ka la iarap ruh ia ki bor pyniaid District bad ia ki pulit ban pynneh ia ka shongsuk shongsain bad ban ai jingiada ia ki heh ki haiñ ban pahara ha ki ophis sorkar jylla bad sorkar pdeng bad kiwei kiwei.
U Bah Comingone ula iathuh ka tnat ka la ai jinghikai ia 7110 ngut ki riew paidbah bad ki samla pule ha ka Disaster Management, Search & Rescue and First Aid ha ki jaka sor bad ha nongkyndong bad ula ong ha u snem 2022-23, ki don 2531 ngut ki Home Guards volunteer bad 330 ki Civil Defence Volunteer kiba la ioh jong hikai.
Nalor kine, ki don ruh 1391 ngut ki Home Guards Volunteer ba la pyntbit ia lade ban ai jingshakri ha ki tnat sorkar, ki kompani shimet bad kiwei.
Ha kane ka sngi u Myntri ula pyndeng Medal for Meritorious Service ia 5 ngut ki Home Guards bad Civil Defence bad ula sam ruh ia ka Director General Civil Defence Disc & Commendation Certificate, MHA, New Delhi 2022 sha ki 12 ngut.
Katba ka Kong I Nongrang, IPS, Director General of Civil Defence & Home Guards, ka la sam ia ka khusnam bad ka song tyngka sha ki 6 ngut ki pulit Home Guards.
Ha ka jingialang la donlang ka Kong MW Nongbri, Executive Director, State Disaster Management Authority (SDMA), Kong C Kharkongor ka Secretary, Civil Defence & Home Guards, u A Agarwal, IPS, Inspector General Police, CRPF bad kiwei.
+ There are no comments
Add yours