Kumba 70% ki jingdih pynbuaid lane ki (Narcotics) kiba wan hapoh Meghalaya, ki wan poi lyngba ka thain East Jaintia Hills district. Ia kane la kam da u Myntri ka tnat Social Welfare u Bah Paul Lyngdoh bad ula iai ban b aka long kaba donkam ban nang pynkhlain bor pahara haki jaka rung jaka mih jong ka Meghalaya. “Nga la iakren bad u Symbud Myntri Rangbah ka Jylla uba khmih iaka tnat kam pohing ban pynkhlain iaki bor pahara haki jaka mih jaka rung sha Meghalaya khamtam ha East Jaintia Hills” la ong u Bah Paul. U Bah Paul ula ong baka jingpynkhlain iaki bor pahara kan dei hadien baka Sorkar Jylla kan pyndep iaka jingthungkam Pulit haka kumba 3000 ngut tam ki Pulit nalor 500 ngut ki Volunteers jong ka Home Guards kin shah thungkam thymmai hapoh ka tnat.
“Hadien ka jinglah ban thungkam thymmai hapoh ka tnat Pulit, ka Sorkar Jylla kan sa lah ban nang pynkhlain shuh shuh iaki bor pahara khamtam haki khydop (Entry Exit Point) haki thain ka East Jaintia Hills bad kane kan iarap iaka Sorkar ban rat dkhong iaka jingwan poi u drok hapoh Meghalaya” ula ong. Haba pynpaw ka Sorkar kala dep pynbna ban iakhun kum ka thma pyrshah ia u droks, u Bah Paul ula ong ba ki sakhi kila paw na ka jingdon bun kiba shah kem, bun ki case kiba la sei madan bad bun ki nongpynkhein ain kila shah kem, kaba pyni ruh ia ka jingtreikam bha jong ka Sorkar bad ki sienjam ba kala pynbna. U Myntri ulapyntip ruh ba ki Pulit kila dep phah ia ka thup kyrteng jong ki nongkhaii droks bala kem bunsien sha ka Advisory Board, ka ban sa shong shen hadien ba kut ka jingtreikam ka Model Code of Conduct (MCC), ba kan shim rai halor ki jingpynsajia ban ai sha ki kat kum ka PITNPDS Act, 1988.
“Ia ka thup la dep ban mynjur bad la phah sha ka Advisory Board bad hadien phin sa iohi ia ki briew ki ban shah pynngat ha ki jingpynsajia namar ka jingkhaii ia ki jingdih buaid bad kane hi kan long ka jingai mynsiem ia ka jingpyrshang jong ki ban tehlakam ia kane ka jingsniew” ula bynrap. Ha kajuh ka por, u Bah Paul u pyntip ba ka Tnad kala tyrwa ruh ban thung ia u Mission Director ba thymmai na ka bynta ka DREAM Project namar ba u Director ba mynta um donpor satia namar kiba bun ki jingkitkhlieh ba u kit hapoh ka Tnad kam Pohiing
