Kumba ju leh man la ka snem hynne ka sngi, ka Martin Luther Christian University ka la pynkup burom ia 1044 ngut ki samla pule kiba la pyndep ia ka kyrdan Degree bad Diploma kynthup 20 ngut ha ka PhD degree ha Lariti International Centre for Performing Arts and Culture. Shwa ban sdang ka prokram, u bah Casper Syiem ula pyllait paidbah ia jingshna da ki dur ba la tip kum ka “Stories by the Fireside” ka iaid ryngkat bad iahap bad ka riti ka dustur bad ka jingiathuhkhana lyngba ka jingpynidur ia ka jingriewspah ka skulbah kaba iadei bad ka kolshor barim bajah. U Fr Stephen Mavely, u Vice Chancellor barim ka Assam Don Bosco University haba kren ha ka jingialang ula pynpaw ba ki don lai tylli ki symboh pyrkhat kiba kongsan kiba baroh ki khynnah pule ki dei ban buh jingmut bha, kaba kynthup ban nang ban phohsniew, ban buh ia ka thong katba lah mardor bad ban pdiang ia ka lynti kaba hap ban iaid nangne shakhmat.
Ula kyntu ruh ia ki samla pule ba man la ka por haba ki iakynduh ia ki jingeh, ki dei ban shim ia ki kum ki jingtynjuh ban peit haduh katno ki skhem ha ka nongrim ka jong ki. Ha kane ka sngi la sam ruh ia ka Alumni Awards sha ki 6 ngut ki samla pule kiba rim kiba kynthup ia Lovitoli Awomi, Morealda Paswet, Parkordor Kharkongor, Iadalin Warbah, Lalonging M. Lyngdoh bad Rinyei Khamrang bad la ai ruh iaka jingaikhublei kyrpang sha ki 19 tylli ki skulbah kiba iatreilang bad ai iaka jingkyrshan bad la pynkut da ka jingpyrbyrngia na ki kynhun tem kiba kynthup ia ka Kdormaju, Amalgam, In Flux bad Ras Johanan.
La pynithuh ia ki nongrah tiensyiem jong ka skulbah Mel bad Sue, kiba kynthup ia u Zishan Gautam, BSc Psychology bad ka Pamela Iohdahun Pyngrope, BA English.
