U Nongwad jingtip lyngba ka Right to Information (RTI) u Bah Disparsing Rani hynne ka sngi u la pyntip baka tnat Meghalaya Police ka la pynsah pisa haduh T.10.54 klur tam sha ki trai kali kiba aiwai ia ki kali. Ia kane u Bah Disparsing u la kynnoh hadien ba ioh ia ka jubab na ki Superintendent of Police (SP) jong ki 10 tylli ki district ka Jylla Meghalaya. Haba kren shaki lad pathai khubor u Bah Disparsing u la ong “Ia ka jubab RTI nga la ioh pdiang tang na ki shiphew tylli ki distrik katba ki bym pat ai jubab ki long ka Nongstoin bad Baghmara”. U Bah Disparsing u la ong ba kane ka ram baka tnat Pulit ka pynsah kadei haba shim wai iaki kali ban pyndonkam ha ki kam jam jong ki ophis treikam ha ka tnat Pulit. “Katkum ka jubab RTI ba nga la ioh pdiang, ha East Khasi HIlls ki kali ba la shim wai na ki riewpaidbah ki long 74 tylli, ki kali ML 02 ki don 270 tylli bad ka pisa kaba hap ban siew sha ki trai kali ka long T.5,93, 80,584 klur. Ha South West Khasi Hills la shim wai 6 tylli ki kali, ki kali ML02 ki don 37 tylli bad ka pisa kaba hap ban siew sha ki trai kali ka long T.21,05, 602 lak. Ha Eastern West Khasi Hills ki don 3 tylli ki kali la shim wai bad ki kali ML02 ki don 11 tylli bad ka pisa ba hap ban siew sha ki trai kali ka long T.7,93,427 lak” u la ong.
U Bah Disparsing u la pyntip ruh ba na West Jaiñtia Hills, ka la jubab ba ym lah ban ai jingtip ia ka jingshimwai ia ki kali paidbah bad la pyntip ruh ba ym lah ban ai jingkheiñ ia ka jingdon jong ki kali ML02 hynrei la shu ai tang ia ka jingtip tang ia ka pisa kaba hap ban siew sha ki trai kali kaba kot T.67,57, 449 lak. U la iathuh ruh ba ha East Jaiñtia Hills ka tnat Pulit ka la aidaw ba ym lah ai jubab ia ki kali ba la shim wai katkum ka Section (g) jong ka RTI Act 200 hynrei la jubab tang ia ka jingdon 45 tylli tylli ki kali ML02 bad ka pisa ba dang sah ban siew sha ki trai ba aiwai kali ka long T.8,91,345 lak bad ha Ri bhoi ruh, ka tnat Pulit ka la jubab ba ym lah ban ai jingtip halor ka jingshim wai ia ki kali paidbah, ia ka jingdon jong ki kali ML02 bad ia ka pisa ba dang sah ban siew sha ki trai kali.
U Bah Disparsing u la pynpaw ba katkum ka jubab RTI ba la ioh pdiang na ka tnat Pulit jong ka South West Garo Hills la pyntip ba ki kali ba la shim wai na ki riew paidbah ki long 13 tylli, ka jingdon jong ki kali ML02 ka long 32 tylli bad ka pisa ba hap ban siew sha ki trai kali ka long T.32 lak. Ha West Garo Hills ka jingshim wai ia ki kali paidbah ka long 35 tylli, ki kali ML02 ki don 82 bad ka pisa kaba hap siew sha ki trai kali ka long T.1,58,48,170 klur. Ha North Garo Hills la shim wai 15 tylli ki kali, ki kali ML02 ki don 54 tylli bad ka pisa kaba hap siew sha ki trai kali ka long T.98,66,266 lak. Ha East Garo Hills District la shim wai 10 tylli ki kali, ki kali ML02 ki don 60 tylli bad kaba pisa ba hap siew sha ki trai kali ka long T.57,35,250 lak.U Bah Rani u la ong ruh ba katkum ka Section 66 jong ka Motor Vehicle Act 1988 ka kdew shai ba ym lah ban shim wai ia ki kali ba khlem register kum ki Comercial Vehicle ne kum ki kali kamai hynrei tang ki kali ba la register kum ki kali kamai ki tnat treikam ka Sorkar ki lah ban shim wai bad ula bynrap da kaba ong “Katkum ka Section 66 jong ka Motor Vehicle Act 1988 ka long kaba be-aiñ ban shim wai ia ki kali shimet jong ki riewpaidbah”.
