Shi sngi hadien ba shimti biang kum u Myntri Rangbahduh ka Ri India, u Narendra Modi ula bthah iaka Sorkar Pdeng ban pyllait T.1071.90 klur naka bynta ka Jylla Meghalaya.
Nalor ka Meghalaya, baroh ki Jylla ka thain shathei Lammihngi (North East) kila ioh iaka song pisa kaba dei ka bhah jong ka khajna ba ioh lum ha baroh kawei ka Ri India.
Ka Meghalaya ka wan ba lai napdeng ki Jylla shathei Lammihngi (North East) kiba ioh bun iaka song pisa naka Sorkar Pdeng.
Ka Assam ka ioh T.4371.38 klur, ka Arunachal Pradesh T.2455.44 klur, Meghalaya T.1071.90 klur, Manipur T.1000.60 klur, Tripura T.989.44 klur, Nagaland T.795.20 klur, Mizoram T.698.78 klur bad ka Sikkim T. 542.22 klur.
Haba iadei bad kane u Myntri Rangbah ka Jylla u Conrad K Sangma u pynpaw ka jingsngewnguh iaka Sorkar Pdeng haka jingialam da u Myntri Rangbahduh bad Myntri Pla Tyngka, daka ba ong ba kane ka jingioh song pisa kham heh kan iarap iaka Sorkar Meghalaya ban pyntyllun iaki kam oynroi hapoh ka Jylla.
“Nga ai khublei iaka Sorkar Pdeng kaba la pyllait palat T.1000 klur ka song pisa bala ioh naka bhah khajna bad kane ka jingkloi ka Sorkar Pdeng ban pyllait iaka song pisa ka pyni iaka jingkitkhia u Myntri Rangbahduh ka Ri ban kyntiew iaki Jylla ka shathei Lammihngi (North East)” la ong u Conrad.
