Palat T.4 klur  mang ka sorkar ba tei Check Health Center ha Byrnihat 

U Myntri ka tnat Animal Husbandry and Veterinary u Bah A.L Hek ula pyntip ba ka tnat ka la phah ka jingtyrwa (Proposal) kumba T.4 klur tam sha ka tnat Pla Tyngka na ka bynta ban ioh sdang noh ia ka Check Health Center Byrnihat, Ri-bhoi district. Ia kane u Bah Hek ula pyntip hadien ka jingialang bad ka Synjuk ki Rangbah Shnong Ri-bhoi kiba la wan kynduh hynne ka sngi ban buddien halor ka jingthmu jong ka tnat Animal Husbandry and Veterinary  ban pyntreikam iaka Check Health Center ha Byrnihat.

Haba kren sha ki lad pathai khubor u Bah Hek ula ong “Ka tnat Animal Husbandry and Veterinary  ka la phah ka jingtyrwa (Proposal) kaba kot haduh T.4 klur sha ka tnat Pla Tyngka ka Sorkar Jylla na ka bynta ban sdang pyntreikam noh ia ka Health Check Center”.U Bah Hek ula iathuh ba ka tnat Animal Husbandry and Veterinary ka la mang palat T.4 klur tam hynrei namar ka jingduna pisa ka tnat ka la mang shwa tang T.1.5 klur ban sdang pyntreikam suki suki katba ka tnat Pla Tyngka kam pat lah ban mynjur ia ka jingtyrwa (Proposal).

Haba kylli halor ka jingdonkam ban don daka Health Check Center, u Bah Hek ula ong “Kane ka Center kan long kum ka jaka buh ia ki jingri ba wanrah na shabar ri ha shuwa ban die sha ki paidbah ka Jylla. U Bah Hek ula pyntip ba ha kane ka Health Check Center kin don ki Doctor na ka tnat Animal Husbandry and Veterinary ban eksamin ia ka koit ka khiah ki Masi, Blang, Syiar bad kiwei ki jait jingri ha shuwa ban pynpoi sha paidbah ka Jylla.