Ka khubor pulit ka ithuh ba kawei ka longkmie ha sah ha East Jaiñtia Hills ka la ujor ha ki pulit ba ka la shah thok T. 7.3 lak ha uwei u briew ba la ithuh kyrteng u Deepankar Barman, uba dei u trai jong ka DB Stock Consultancy, GS Road, Ulubari Guwahati, Assam na ka bynta ban bei tyngka ha ka Stock Market. Kane ka jingjia ka la jia ha ka 14 tarik Nohprah, 2023 ka la phah pisa T.7.3 lak sha u Deepankar Barman. Hynrei hadien la lap ba ka ophis ka la khang khyrdep bad ym tip shuh sahei ka jaka sah jong u Deepankar Barman.
Hawei pat ka jingjia uwei u nongshong shnong ha East Jaiñtia Hills ula ujor ha ki pulit ba ha ka 18 Nailar 2022 ula phah pisa T. 60,000/- sha u Deepankar Barman, u trai jong ka DB Stock Consultancy, GS Road, Ulubari Guwahati, na ka bynta ban bei tyngka ha ka Stock Market. Hynrei kham hadien la lap ba katei ka ophis ka la khang khyrdep.
Kumjuh uwei pat u nongshong shnong ha East Jaiñtia Hills ula ujor ba ha ka 15 tarik Nohprah, 2023 u la phah T.2 lak sha ka M/s BD Stock Consultancy na bynta ban bei pisa ha ka Iew Stock Market. Hynrei hadien la lap ba katei ka ophis ka la khang khyrdep bad u Deepankar Barman ula jah rngai ym tip shuh shaei u don. Ki pulit ki dang pynlong ka jingtohkit halor kane ka jingjia.
