Ka Sorkar Jylla ka la pan jingiarap na ka North Eastern Space Application Centre (NESAC) na ka bynta ban shondur ia ki jaka ba lah ban don ka jingtwa khyndew. Ia kane la pyntip da u Commissioner & Secretary ka Revenue and Disaster Management u Sanjay Goyal bad ula ong ba ia kane la leh khnang namar ba ka aiom lyiur ka la wan mynta u snem.
“Ngi la sor jamin bha ia ki katto katne ki jaka bad ngi la pan jingiarap na ka NESAC ban shondur lyngba ki Satellite ia ki jaka ba lah ban don ka jingtwa khyndew khamtam ha kane ka por lyiur” la ong u Goyal. U la iathuh ia ki dur (Mapping) bad ia ka kaiphod ba la ioh na ka NESAC la phah ruh sha baroh ki Deputy Commissioner (DC) jong baroh ki district ban shim ki lad ki lynti ba ia dei bad ki jaka ba lah ban don ka jingtwa khyndew.
Ula bynrap watla ka Sorkar ka la shim jingiarap na ka NESAC hynrei namar ba ka jinglong jingman ka Jylla ka kham iapher bad kiwei ki Jylla, namar kata ym lah ban iathuh lypa, haei, kita ki jaka kiba lah ban don ka jingtwa khyndew. “Namar ba ka Shillong ka dei ka Nongbah kaba kham bun briew, ka Sorkar bad ka NESAC ruh ka la shimkhia ban ithuh lypa ia ki jaka lyngba ka jingshondur da ki Satellite” ula ong.
