U Myntri Rangbah ka Jylla Conrad K Sangma ula her sha Delhi ban iakynduh ia bun ngut ki Myntri ka sorkar pdeng ban pan jingkyrshan ban kyntiew ia ka roi ka par ha Meghalaya.
U Conrad K Sangma ula leit iakynduh ia ki Myntri Sorkar bapher bapher ban pan jingiarap ban kyntiew ia ka jingseng ia ki karkhana, ban tei ia ki jingtei bapher, ka pule puthi bad kiwei kiwei.
U Myntri Rangbah ula leit iakynduh ia u Myntri Khynnah ka Skill Development and Entrepreneurship u Jayant Choudhury ban kyrshan ia ka jingthmu ka sorkar jylla ban buh ia ka Skill Park ha nongbah Shillong bad Tura.
U Myntri Rangbah ha ka rynsan X, ba ula iakynduh ia u MoS Jayant Choudhury ban iakren halor ka plan ba ka Sorkar ka thrang ban sdang ia ka Skill Park ha Shillong bad Tura, ban ai jinghikai pyntbit ia ka sap ka phong jong ki samla khnang ba kin lah ban ioh kam ioh jam.
Ula iakynduh ia u Myntri ka Pule Puthi u Dharmendra Pradhan ban pyntip ia ka jingiaid ki project ka pule puthi ha ka jylla bad ula kyrpad ia u Myntri ba un nang bteng ban ai ka jingkyrshan ban kyntiew ia ka pule puthi ha ka jylla.
U Conrad ula leit iakynduh ia u Myntri ka Tnad Commerce & Industries Piyush Goel bad pan ia ka jingpyrshan ban pynkhlain ia ka jingdon ki karkhana hapoh ka jylla bad iakynduh ruh ia ka Myntri Pla Tyngka ka Nirmala Sitharaman ban pyntip ia ki project ka Sorkar pdeng kiba dang iaid shakhmat hapoh Meghalaya bad ula pan ia ka jingkyrshan ban bei pisa sha ka Meghalaya Economic Growth Accelerator (MEGA) Corridor Project ha kane ka Finance Commission kaba mynta.
Ula leit iakynduh ruh ia u Myntri ka Development of North Eastern Region (DoNER) u Jyotradhitya M Scindia bad pan ia ka jingkyrshan pisa na ka bynta ki projeck kam pynroi ha Jylla bad ban nang pynbun ia ka jingbhah tyngka lyngba ka DoNER.
U Conrad ula iakynduh ruh ia u Myntri ka Information Technology, u Ashiwini Vaishnam ban pyntip ia ki project kiba thmu ban pyntrei ha Meghalaya ban pynkhlain ia ka synshar khadar lyngba ki jingkheiñ jingdiah.
