Hadien ba ki paidbah nongshong shnong jong ki katto katte tylli ki shnong ba hap hapoh ka West Jaiñtia Hills District ki la mad ia ka jingshah pynjulor ki iing ki sem kumjuh u kba haki pynthor na ka daw ka jingwan lynshop kynsan u phria ba jur haka 05/11/24, hynne ka sngi na ka liang u MLA ka 2-Jowai constituency u Wailadmiki Shylla u hiar ha ophis u Deputy Commissioner ka West Jaiñtia Hills District, Jowai ban lum jingkheiñ na ki bor district ba haduh katno ka jingshah ktah ki paidbah naduh ki iing ki sem kumjuh ki jaka rep khnang ban ialeh pynsted kloi ki lad jingiarap sha kiba shahktah. Hadien ka jingiakynduh bad ki bor district u Wailadmiki Shylla u iathuh ba don kumba 9 tylli ki shnong ba shahktah kiba hap hapoh ka Thadlaskeiñ bad Amlarem Block, bad ka jingshah pynjulor ba bun eh naka jingwan lynshop u phria dei u kba bad ka area ba shahktah kala kot shaka 131.62 hectar, ki iing ba shahktah pat 32 ha shnong Muphlang, 5 ïing ha Pynthorlangteiñ, 2 ïing ha Iongnoh bad 5 ïing ha Mustem.
Ha ka jingiadei bad ki lad jingiarap u ong, na ka bynta ki jingiarap ba kyrkieh ula kyntu ba dei ban pyllait kloi noh iaki tin sop ïing ha ka taiew ban wan. Katba na ka bynta ka jingshah pynjulor kba, u kyntu iaki paidbah nongrep ba kin iaishah namar naka liang ki tnat sorkar kin hap ban leit jurip pyntikna iaki jaka ba shahktah bad ban phah ruh ia ka bui report sha Shillong na ka bynta ban ioh jingmynjur. Shuh shuh u ong haba ia dei bad ki lad ai jingiarap bun sien ki paidbah ki juh ujor ba duna, hynrei u pynshai dei namar ba hap bud katkum ki kyndon ka national relief fund bad ym lah ban pyntam ne pynduna naka dor ba kila buh, kata 8500 ki lad jingiarap naka bynta shi hectare ka jaka.
Nangta naka bynta kito ki nongrep kiba la duh symbai ruh ban rep ha u snem ban wan naka daw ba shah pynjulor, u ong ba un sa iakren bad ka sorkar kumjuh ka tnat ka rep ka riang ba kin wad lad ia kiba shah ktah kiba la duh wat ban buh symbai.
