Pan jingkyrshan ka Kong Ampareen na ki paidbah ban pynjop ia ka NPP

Ka kong Ampareen Lyngdoh ka la pyndep ia ka jing leit thep kyrteng ia lade kum ka kyrtong ka NPP sha ka Lok Sabha na Shillong Parliamentary konstiwensi. Ha kane ka jingleit thep kyrteng la synranlang ryngkat ki nongialam ka NPP kiba dei ruh ki Symbud Myntri Rangbah ka jylla kynthup u bah Prestone Tynsong bad u bah Sniawbhalang Dhar, u CEM ka KHADC, ki MDC, ki MLA bad da ki spah ngut ki paidbah. Haba kren sha ki lad pathai khubor hadien ba la dep thep kyrteng, ka kong Ampareen ka la ong ba kam kwah ban kynnoh ban kynthoh ia kino kino ki party hynrei ka la pan ka jingkyrshan na ki paidbah ha kane ka thma ilekshon. “Kane ka dei ka thma jong nga, ngam kwah kren pyrshah iano iano hynrei ai ba kane ka ilekshon kan sa pyni hi da lade. Ha ka jingiakhun dei ban don ki nongialeh pyrshah kumba long ha ka jinglehkai phutbol. Hynrei hap ban ia peit ka NPP ka sei ia ki nongialehkai kiba kumno bad mano ban sa thep ia ka kol ba khatduh,” ong ka kong Ampareen.Ka la kyrpad ia ki nongshong shnong ba kin ai ka jingkyrshan bad ba kan long ka sien banyngkong ba ka longkmie kan leit sha Parliament bad kim dei ban khuslai ia ka riam ba ka phong hynrei ki dei ban peit ia kaei ka ban kren.

Ka kong Ampareen ka la ong ba ka Uniform kiwei ka lah ban long kaba jyrngam, kaba saw hynrei ka shap jong ka kan dei beit ka Kot.“Ngam kren sniew, ka uniform kiwei ka lah ban long kaba blue, green, pink, ka jong nga te ka dei ka shap jong ka kot bad, nga dei na ka NPP, to ki paidbah jied lem ia nga. To, yn nai pynpaw than ia ka jingiatan, namar ba phi pynkulmar ia ki paidbah. Kane kam dei ka elekshon khah khah kum MLA, ka dei ka MP. To seh, ngin iatreilang”, ka la ong. Ka la bynrap ba ka sngew burom ia ka NPP kaba ai lad ia ka, ban mih kum ka kyrtong MP ba ka la dep iuhkjat sha ki 36 tylli ki konstitwensi ban iakynduh bad shim ia ka jingkyrkhu na baroh ki nongialam niam, ki nongialam seng sain pyrthei bapher bapher.

 “Nga la dep ban leit kynduh ia ki nongialam bapher bapher ha baroh 36 tylli ki konstitwensi naduh ki nongialam niam, ki nongialam seng sain pyrthei, bad nga shaniah ha u Blei ba un ai ia ka lad,” ka la bynrap. Ka kong Ampareen ka la ong ba kum ka kyrtong kan tyrwa ia la ki jong ki mat ka bym don jingiadei eiei bad ka pisa namar ba ka mih ban shakri ia u paidbah, ym ban iatan tyllai, ym ban kynthah iano iano watla ki don kiba ia kawang namar ba ki la ia mlien ha ka por elekshon. Ka la ong ruh ba ka NPP kam dei ka party nongwei hynrei ka dei ka party jong ki Khasi-Jaintia bad Garo kiba dei ki nongshong shnong jong kane ka jylla bad ka la pan ia ka jingkyrshan ba kan long ka MP longkmie ba nyngkong eh na ka jylla.

Ha kajuh ka por, ka la ong ba ki mat ba iadei bad ka jaitbynriew, kan sa rah ban iasaid yn da u paidbah un ai ia ka jingjop. “Ngin ai la ka jong ka jingkular, kam don jingiadei bad ka pisa, ngi wan ban shakri ia u paidbah, ym ban iasaid, ban iatan tyllai, teng khat ki nongialam ki shongshit, yn nai iakynthoh  iano iano hynrei yn ong sa kumno, haba la mlien kane ka rukom te, ban ialeh elekshon, tharai kin iawang beit. Ynda la dep elekshon to ngin iatreilang, ngim dei ban buh khoh buh shun.  Ngam kwah ban kren ia kano kano ka party ne ki kyrtong, hynrei ngan kren ia ka party lajong ka NPP.”