U Deputy CEM ka ka Khasi Hills Autonomous District Council (KHADC) u Bah PN Syiem hynne ka sngi ula lum ka jingialang bad ki Rangbah Shnong ka Nongbah Shillong ban iathir halor ki sienjam ban shim ban rat dkhong ia u Drok napoh ka Jylla. Ha kane ka jingialang, la wan shim bynta ki Rangbah Shnong, ki nongialam ka Synjuk Nong Synshar Shnong bad ki riew rangbah na kylleng ka Nongbah Shillong. Haba kren bad sha ki lad pathai khubor, u Bah PN Syiem ula iathuh ka thong jong ka jingialang ka long ban iatai sani bha kumno ban thaw lad ban pynduna ia ka jingjyllei u drok bad ka jingbun kiba ngop ha utei u jingdih ba shyrkhei.
U Bah PN Syiem ula ong, ha ka jingialang, ka KHADC ka la pan jingmut ruh na ki Rangbah Shnong bad baroh kiba wan shim bynta, haba ia dei bad ki sienjam bad ka kamram ki Dorbar Shnong ban iakhun thma pyrshah ia u Drok. “Nalor ki mat ba la kren ha kane ka sngi, ngi la kyntu ruh ia ki Rangbah Shnong lada ki dang don shuh ki jingmut ba kin phah biang hapoh ka shi taiew sha ka Council khnang ba kan bishar bniah ha shuwa ban pynbna paidbah” la ong u bah PN Syiem.
U Deputy CEM ula iathuh hadien ba u Lat ka Jylla ula ai ka jingmynjur ia ka Administration of Elaka Amendment Bill, kaba mynta ka la long aiñ, na ka liang ka Council mynta ka pynkhreh ban thaw ia ki Rules ha shuwa ban pyntip paidbah. U Bah PN Syiem ula iathuh ba hapoh kane ka ain Administration of Elaka Amendment Bill kin don ruh ki Vigilance Committee lane ka kynhun ban peitngor ban treilang bad ki bor ka ain la ka long ban ia khun pyrshah ia u drok, ki nongkhaii lane ia ki nongdih drok.
