Ki nongialam ka KHNAM State Wing, mynta ka sngi ki la mih shakhmat ban leit pan jingshai na ka Medical Superintendent (MS), ka Nongpoh Civil Hospital halor ka jingjia kaba sngewsih ba kawei ka longkmie ka la duh ei ia i khyllung hadien ba ka kum kha ha ka jaka leit bar jong katei ka hospital. Lah ban kdew, ba kane ka jingjia kaba sngewsih, ha kaba kawei ka longkmie na Umden Diwon ka la duh noh ia la i khyllung hadien ba ka kum kha ia i khyllung hapoh ka jaka leit bar jong ka Nongpoh Civil Hospital ha ka janmiet jong ka 21 tarik Nailur 2024. Haba leit wad jingshai halor kane ka jingjia, na ka liang ka KHNAM State Wing la lamkhmat da u Bah Joseph H Pyngrope kum u President lem bad ki dkhot kiba la kynduh ia katei ka longkmie bad u kurim jong nga ban pynpaw ruh ia ka jingsngewlem halor Katei ka jingjia bad ruh ki la kynduh ia ka MS jong ka Nongpoh Civil Hospital.
Haba kren bad ki Nongthoh Khubor, u Bah Pyngrope kum u nongialam ka KHNAM State Wing, u la pynpaw ia ka jingsngewkhia kaba jur halor kine ki jingjia kiba sngewsih kiba la nang iai jia ha ki jaka sumar paidbah, ha kaba u la iathuh ruh, ba ha ka jingiakynduh bad ka MS, na ka liang jong ka ruh kam shem la lah ban ai jingshai satia halor kane ka jingjia kaba sngewsih bad ruh ka la phah pat ia ki ban wan ha kiwei pat ki sngi. U la iathuh ruh, ba ka KHNAM ka la pynrem jur ruh ia ka jingpynap ia kane ka longkmie haduh 2 kynta ban ioh rung shapoh ka hospital ban ioh pat ia ki jingsumar tang na ka daw ka jingbym don briew ba ap ha khyrdop jong katei ka Hospital ha ki por mynmiet.
“Hato kita ki aiñ ne ki policy ba la pyntreikam da ki bor ka sorkar jylla katkum ka Mother Policy ka la kdew ba kane ka longkmie ka dei ban ioh ia ka jingsumar kaba paka ha kane ka hospital nalor kane hato ka “First Referral Unit (FRU)” bad ka “Antenatal care” ka treikam ne em ha kane ka Hospital bad lada ka treikam, balei katei ka longkmie kan hap ban ieng haduh 2 kynta habar ka Gate Hospital ha ka por ba wan ban phah sumar”, buh jingkylli u Bah Pyngrope. Shuh shuh ruh, na ka liang ka KHNAM State Wing, la pynpaw ba kim pat hun ia kane ka jingia kynduh ia ka MS jong ka Civil Hospital, Nongpoh bad kin nang buddien ia kane ka jingjia ban ioh ia ka jingpynshai kaba pura.
