Ka skul North Liberty Higher Secondary School Jowai kawei na ki skul ha Rilum Jaiñtia kaba juh paw bha ha ki result SSLC bad HSSLC mynta ka kynti ruh ha ka result HSSLC Science Stream 2024 ba la pynbna hynne ka sngi da ka MBOSE, kane ka skul ka la ioh rah biang ia ka nam lyngba ka jingrung ki 2 ngut ki samla pule jong ka haka thup Top -10. Kine ki arngut bala rung haka thup Top-10 kynthup u Weibha Nongtdu Lakiang uba la poi haka kyrdan 6th position da kaba ioh 93.2%, bad ioh highest marks ruh haka subject Mathematics.
Nangta u Joshaviah Onan Paswet uba la poi haka kyrdan 7th position da kaba ioh 92%, bad ioh highest marks ruh haka English bad Mathematics. Haba iakren bad u Principal jong kane ka skul u Richard B Uriah u iathuh ba napdeng ki 35 ngut kiba iakhun ia ka HSSLC Science Stream baroh ki pass lut, 29 ngut ki ioh First Division, 6 ngut pat haka Second Division. Bad kine ki arngut bala rah nam iaka skul dei kiba pule ha kane hi ka skul naduh dangrit. U ong ruh ba sngewdiaw kyndiat namar ba sa arngut ki samla kila duh noh ban rung haka thup Top-10 tang da khyndiat marks eh.
Haba iadei bad kane ka jingjop naka liang u Weibha Nongtdu Lakiang bad u Joshaviah Onan Paswet ki ong, nyngkong eh dei ban shaniah ha u Blei bad pan ruh ka jingstad jingshemphang na u, nangta dei ban shaniah bad ngeit ruh iaki jinghikai jong ki nonghikai. Baroh ar ngut kine ki samla ki don ka jingthrang ban leit pule medical bad ki dang shuh dep thoh ruh ia ka exam NEET.
Na ka liang ki kmie ki kpa jong kine ki samla ruh ki pynpaw ka jingkmen bakhraw ia ka jingrah nam ki khun jong ki, kumta ki kyntu ia kiwei pat ki longkmie longkpa ba kin long ki nongai mynsiem nongpynshlur ia ki khun ki kti ha kano kano ka sap ba ki don kumba ma ki ruh ki iai don beit ha syndah ki khun na ka bynta ban ai mynsiem bad pynshlur ia ka kam ba bha ba ki leh. Ha kajuh ka por ban sneng ban khraw ruh iaki khnang ba kin lah ban iaid haka lynti ba bha jong ka jingim.
