Ha shwa ban plie ia ka tamasa paidbah ka Amul Falcon ha ka 7, 8 bad 9 tarik Naiwieng, ka kynhun ki nongpyniaid ka Eastern Ri-Bhoi Tourism and Environment Development (ERTED) ka la ialam ia ki khynnah skul, ki nonghikai, bad ki briew na ka tnad iada mrad ban leit sakhi ia katei ka jaka. Ia kane ka tamasa Amul Falcon yn pynlong ha ka thain Ri Bhoi. Ka thain ri Bhoi ka dei kawei na ki thain kaba seisoh ha ka rep ka riang bad ka don ruh shibun ki jinglong phylla kiba la thaw bad buh ka mariang bad kane ka la khring ia ki briew na kylleng ki jaka ban leit sha jaka sah jaka rep. Hynrei kaba kham sngew phylla ka long ba wat ia ki sim ki doh ruh ka la khring bad kane ka la sakhi ha kaba ka shnong Umru kaba jngai kumba 5 km eiei na Mawlasnai bad 25 km eiei na Umroi, ka khring ia ki sim kbeit ne Amul Falcon naduh ri Sebria kaba jngai 22 hajar kilometre ban wan sah kai kumba shi bnai eiei ha katei ka them. U chairman ka Eastern Ri-Bhoi Tourism and Environment Development (ERTED) u bah Alos Nongpoh u la pynshai shaphang ka sienjam ba ka seng ka la shim ban pyllong kum ka lad ban khring ia ki nongwankai na ka jingwan kine ki sim kbeit khnang ban kyntiew ia katei ka thain kaba sahdien kaba don ha khappud bad ka Assam.
Kumjuh u Rangbah Shnong ka Umru u bah Daktring Mangu, ula khot sngewbha ia ki paidbah ban wan peitkai ia ki sim kbeit bad ha kajuh ka por, ula kyrpad ia ka bor kaba dei peit ka sorkar Meghalaya, ban leh eiei ia katei ka jaka ban pynitynnad ia katei ka jaka thiah jong ki sim kbeit. U la ong ruh ba ka shnong ka la maham ba ym dei ban pyniap ia kine ki sim ki doh bad lada lap ia kiba leh tam, kan aiti sha ka bor sorkar. La ioh ban iakren bad ki trai shnong ka Umru kiba la iathuh ba kine ki sim kbeit ki la sdang wan sahkai sha katei ka shnong la bun snem mynta bad ki sah tang kumba shi bnai eiei bad ki sa leit phai noh. Ban iohi ia kine ki sim, hap ban ap haduh 4:30 pm ha ka por janmiet ba ki wan phai na jaka wad bam bad ha ka por mynstep hap ban leit ap ha ka por 4 baje eiei shwa ba kin kynther snier ban khie na jaka thiah ban leit wad bam kylleng.
Katkum ka jingiathuh ki nongshong shnong, ha ka por mynshwa, ki ju kem ia kine ki sim ban bam doh hynrei ha kine ki phew snem, naduh ba la pynsngewthuh ki briew na ka tnad iada mrad, kim ju pyniap shuh ia ki hynrei ki la long pynban ki paralok ban pdiang sngewbha ia ki ban peitkai, bad kawei pat ka long ban pyllong ia ki kum ki paralok ban wanrah spah ia ki nongshong shnong ha ka kam jngohkai pyrthei.
