Ka Tnad sam marbam ka sorkar jylla ka die ia u khaw None-National Food Security Act (None NFSA) bad u kew palat ia ka dor jong ka Food Corporation of India (FCI) bad la suba kane ka jingdie tam ia u khaw bad u kew ka lah ban don ka jingbamsap hapoh ka tnad sam marbam ka jylla. Ka khubor ba la ioh ka iathuh ka dor u khaw None NFSA ka long T.830 shi quintal na FCI katba ka tnat sam marbam ka phah thep pisa T.930 shi quintal ia ki wholesaler, ha ka jingshisha katkum ki kyndon ia utei u khaw dei ban die hapoh T.12 shi kilo hynrei la die sha ki paidbah ha ka dor T.14 shi kilo. Kaba lyngngoh ka long ia ka pisa la thep ha ki ar tylli ki account, kata T.830 la thep ha account ka FCI ba dei ka dor u khaw, katba T.100 la thep sha ka account u Director ka tnat Supply ka jylla bad ia kane ka pisa ym lah ban tip shaei ka tnat ka pyndonkam haduh mynta.
Katkum ka jingtip ba la ioh na ka FCI ka Ministry of Consumer Affairs, Food and Public Distribution ka bhah khaw ha ka jylla Meghalaya kynthup u NFSA u khaw ai ei bad u None NFSA ba hap siew pisa ka long T.128626.11 quintal shibnai, katba ia u khaw None NFSA ka long 113349-01 quintal shibnai, kumta lada khein ka pisa T.100 ba shim ka tnad supply ka la kot daki phew lak shibnai bad ka jingkylli ka long shaei ki pyndonkam ia katei ka pisa bad la suba ka jingiabam sap ka shyrkhei hapoh ka tnat supply ka jylla. Katba ia u kew (wheat) ka tnat supply ka la pynkiew T.200 na ka dor jong ka FCI kaba long T.610 shi quintal ban sam ia ki paidbah bad ia katei ka pisa T.200 la thep sha account jong u Director katba ka T.610ba dei ka dor u kew la thep ha ka account ka FCI. Ka Ministry of Consumer Affairs, Food and Public Distribution ka la mang 10,310 quintal u kew na bynta ka Shillong, East Khasi Hills bad 7930 quintal ia ka Nongpoh, Ri Bhoi District bad ka tnat supply ka ai sha ki 40 tylli kor tyllait atta (Chakki Mill) rngai kiba khlem treikam.
La iathuh ka tnat supply ka sam tang 10 percent u kew ne Atta sha ki paidbah katba 90 percent la kynnoh ka die noh riewshimet bad shim tang ka pisa da ka jingsngewthuh jingmut lang ki ophisar ka tnat supply bad ki nongthied bad la sngewthuh ba 90 percent u Atta ba dei ban sam sha ki paidbah u poi sha ki iew ki hat. La suba ka jingioh lum pisa kam duna ia ka T.30 ne T40 lak shibnai na u atta ba die bad ia katei ka pisa la kynnoh ka leit ha pla ki heh ophisar. Kane ka jyrsieh bamsap hapoh ka tnat supply ka kam dei shuh kaba dang shen ka don la katto katne snem ba dei ia u khaw Non NFSA bad u kew bad la kynnoh ki don tang katto katne ngut ki ophisar ba donkti ba leh ia katei ka kam hynrei ka sorkar shym la pynkynriah ia ki wat la ki la don bun bun snem na bynta ban ioh myntoi shimet. Kum ban pynpaw ha East Khasi Hills ki paidbah ki dang ioh atta wat la kam long katkum ka bhah ba la mang, katba ha Ri Bhoi ym ju sam atta shuh mynta la bun bun snem lait tang u khlaw, shaei ka bhah kew ne atta ka jah rngai ha Ri Bhoi District bad lada tih bniah ka lah ban don sa kiwei ki bamsap hapoh ka tnat supply ka jylla.
