Ka jingkiew dor ki marbam ha kine ki sngi ka la ktah ia ki paidbah hynrei ym don ba nud ban ujor sha ki bor ba dei peit kaba pynlong ia ki nongkhaii ban shim kabu ban nangiaid pynkiew dor ia ki marbam katba ki sngewbit, namar ka tnad Supply ka jylla kam don por shuh ban leit jurip ha ki iew ki hat bad wat ban pyntip ia ka dor ka mur ki marbam ruh kwah shuh ioh ka ktah iano iano.
Kumba long mynta ka dor u piat ka long T.70 shi kilo, u phan T.40 shi kilo bad ka umphniang bam Neraj ka long T.70 shiteng liter. Hynrei kaba lyngngoh ka umphniang bam ha u bilor shiteng liter la thoh ha ka dor T.87 ka Maximum Retail Price (MRP) hynrei la die pat pat ha ka dor T.70 kaba pynpaw ba ka dor ka la hiar haduh T.17 lada khein katkum ka MRP ba la thoh ha u bilor, haba kylli na ki nongkhaii ki ong ba ka la kiew dor, katba ha ki bnai ba la dep ki don ki dukan ba die T.60 shiteng liter ka umphniang bam bad ki don ruh ki dukan ba die khlem thoh dor.
Kane ka pynpaw ba ka lah ban don ka jingleh buit tuh ki nongkhaii ban pynbiej ia ki paidbah nongthied ba ka dor umphiang ka la hiar, namar ka dor ba thoh ka kham heh ban ia ka dor ba die. Nalor kata la suba ba katei ka dor kam dei kaba print ka kompani hynrei ka lah ban long ba shu thoh ne pyndap da ki nongkhaii ban pynkiew dor. Lada ka long ha kane ka rukom katno tam ia kiwei ki marbam ba die ha iew kiba khlem thoh dor kaba ki nongkhaii ki shim kabu ia ki paidbah. Ka sorkar jylla ka dei ban shimkhia ba ki paidbah kim dei ban shah khniot ne long langknia ha ki nongkhaii kiba kwan myntoi shimet.
