Palat shispah ngut ki samla na Guwahati ki la pyni ia ka buit thymmai ha ki kam bapher bapher ha ka lympung ba la tip kum Samsung ka ‘Solve for Tomorrow’, ba la pynlong ha IIT Guwahati bad Royal Global University. Ka jingthmu jong kane ka lympung, ka long ban pynshlur ia ki pynmih ia ki buit bad ki lad treikam thymmai na ka bynta ban wanrah ia ki lad ki lynti ban pynduna ia ki jingeh kiba mih ha ka imlang sahlang, bad ha kane ka lympung la sakhi ia ka jingangnud na ka liang jong ki khynnah samla ban wanrah ia ki lad ki lynti thymmai ba ialeh ia ki jingeh kiba iadei bad ka mariang sawdong sawkun. Ki nongiashim bynta ki kynthup naduh ki khynnah kiba 14 snem haduh 22 snem, kiba la pyni paidbah ia kine ki lad ki lynti ba lah ban pyndonkam na ka bynta ban iada ia ka jingshah ktah ka mariang, kynthup naduh kumno ban leh na ka bynta ban pyniakhlad ia ki jaboh, ka jingjaboh ka lyer, ka um, bad ka jing kylla ha ka jinglong jingman ka suinbneng kaba ym lah ban sngewthuh. Ki la pynpaw ia ka jingdonkam ban don ki rynsan kum ka Samsung’s ‘Solve for Tomorrow’ kaban btin lynti bad kyrshan ia ki ha kine ki jingpyrshang ban pynkylla ia kine ki buit thymmai bad pynurlong bad pyntreikam ia ki khang ba kan wanrah jingbha ia ki nongshong shnong baroh.
Ha kane ka lympung la iadon lang U Dr. Jatin Wahane, uba long u nongioh ia ka khusnam Karamveer Chakra bad uba long ruh u scientist shna rocket ba paw nam, uba la iasam ia ki symboh pyrkhat bad ai mynsiem ia ki samla ba kidei ban pyrkhat ia ki rukom pyrkhat thymmai na ka bynta ba yn lah ban ialeh pyrshah ia ki jingeh kiba don ha ka pyrthei. Ka jingiatehlok jong ka Samsung bad ka Ministry of Electronics & Information Technology’s (MeitY) Startup Hub, Foundation for Innovation & Technology Transfer (FITT) ha IIT Delhi, bad ka United Nations ha India ka pyni ia ka jingaiti lut jong ka ban pynshlur ne btin lynti ia kito kiba don ia ki buit treikam ba thymmai jong ka pateng ban wan.
Mynta u snem, ka ‘Solve for Tomorrow’ ka wanrah ia ki ar tylli ki bynta– kawei na ka bynta ki skul ne School Track bad kawei pat na ka bynta ki samla ne Youth Track, bad kine ki bynta ki don la ki jong ki matphang: “community and inclusion” na ka bynta kito kiba dap 14-17 snem, bad “environment and sustainability” na ka bynta kito kiba la dap 18-22 snem. Kane ka sienjam ka long ban ai jinghikai, ban btin lynti bad ailad ia ki ba ki lah ban shna ia ki kor ki bor ba la leh katkum ka buit thymmai, ha kaba ka kynhun kaba jop kan ioh ruh ia ka khusnam na ka bynta ba yn lah ban nang hikai shuh shuh ia ki bad iarap ia ki ba kin nang kiew shuh shuh ha ka kam. Kane ka lympung ym tang ba ka pynkup bor ia ki samla ba ki lah ban pynmih ia ki buit treikam thymmai hynrei ba kin long ruh kiba iahap bad ka jingshakri ka Samsung Electronics ba la noh synniang sha ka imlang sahlang ha ka pyrthei ne ka global CSR vision ba la tip kum ka ‘Together for Tomorrow! Enabling People’, kaba la leh na ka bynta ban ai jinghikai bad plie lad plie lynti ban iarap ban saindur ia ka lawei jong ki nongialam ha ka pateng ban wan.
Na ka bynta kito kiba don ka mon bad kiba kwah ban iashim bynta, ia ka aplikashon na ka bynta ka Samsung’s ‘Solve for Tomorrow’ la plie paidbah bad la lah ban ioh haduh ka 31 tarik U Jymmang, 2024, na ka www.samsung.com/in/solvefortomorrow. Da ka jingdon jong ka ha kumba 63 tylli ki ri bad ka jingiashim bynta jong ki briew kaba long haduh palat 2.3 million ha kylleng ka pyrthei, ka ‘Solve for Tomorrow’ ka iai bteng ban ai mynsiem bad pynkup bor ia ki nongialam kiba ha ka pateng ban wan.
