Ha kine ki khyndiat ka Khasi Students Union (KSU) ka la mih madan ban iakhun pyrshah ia ki kam thurmur ka MPSC ha ka jingpyniaid ia ka eksamin MCS (Prelims) ha kane ka jylla. Ka KSU mynta ka sngi ka la ioh pdiang ia kawei ka shithi ha ophis, na ki kynhun kiba pas ia ka eksam MCS (Prelims). Ha kane ka shithi, jong ki kandidet kiba la pas ia ka eksam Prelims, ki la pynpaw ia ka jingiaroh ia ki sienjam ba la shim da ka seng halor ka jingdawa ban pynbeit ia ki kam thurmur ka MPSC ha ka jingpynrung kam MCS bad ka jingdawa ba dei ban sei madan ia ki mark jong baroh ki samla kiba iakhun ia ka eksam.
Kine ki kynhun kandidet, ha ka shithi ki la pynpaw ba ki kwah ban pyntip ba ha ka Second list ba la pynmih da ka MPSC hadien ba ka MPSC ka la kam ba don ka jingbakla, ki la kynnoh ba la don kawei ka kyrteng jong ki kandidet kaba dei ka khun jong uwei u heh ophisar ka MPSC kaba pyrshah halor ka jingdawa ka seng ban sei madan ia ki mark kumba la dawa da ka seng KSU. “Kane ka dei kawei na ki 6 (hynriew) ngut ki kandidet kiba la soi ia ka aplekshon na bynta ban pyrshah ia ka jingdawa ka seng ban sei madan ia ki mark jong ki samla kiba iakhun ia ka eksam MCS”, ki la kynnoh ha ka shithi kaba la ioh pdiang ka KSU.
Kine ki kandidet ha ka shithi ki la kam ba ka khun jong une u heh ka MPSC ka la shah jied ha ka LDA ba la pynlong da ka MPSC hadien ba la pynbna ia ka resol ha u bnai Naitung, bad ki la kynnoh ba kane ka pyni ia ka jingleh shilliang khmat ha ka rukom jied bad thunng kam ha MPSC. Ki la kyntu ia ka seng ba kan shimkhia halor kane, khnang ban pyntikna ba kan don ka jingkhuid jingsuba ha ka rukom thung kam thungjam mynta bad hadien ha bud ruh. “Ngi kyrmen ba phin iai bteng ban iakhun pyrshah ia kane haduh ban da kut. Ka jingiakhun ka jong phi, kan long ka jingai mynsiem ia ngi kiba thrang kam, ki bym don kano kano ka jingiadei bad kino kino kiba trei ha MPSC,” ki la ong.
