Paw kyrteng u Bah AL Hek bad Ernest 

Ki nongialam bad ki nongkitkam ka seng BJP ki la kham noh mynsiem sha u Bah AL Hek uba long u MLA ka Seng bad ia u President barim ka BJP u Bah Ernest Mawrie ban iakhun ilekshon MP Lok Sabha 2024 na Shillong Parliamentary Constituency. Katkum ki khubor ba la ioh lum, la iathuh ki nongialam ka BJP Meghalaya ha kine ki khyndiat sngi, ki la iakren bha shaphang ka kyrteng jong ka Kong Finela Lyngdoh Nonglait, u Bah AL Hek bad u Bah Ernest Mawrie ba kin long kum ki kyrtong kiba ka seng kan jied napdeng kitei ki 3 ngut ban iakhun ilekshon MP. Haba iakren bad katto katne ki la kham noh mynsiem sha u Bah AL Hek bad ia u Bah Ernest Mawrie ban iakhun ia ka ilekshon namar ba ki dei ki nongialam kiba la rim ha ka seng bad ki dei ruh kiba don ia ka jingiadei bad ki nongkitkam, ki nongkyrshan ka seng bad kumjuh bad ki riewpaidbah ha kylleng ka rilum Khasi bad Jaintia.

Ki nongialam ka BJP ki bym kwah ban pynpaw ia ka kyrteng ki la ong, kan bha shibun ia ka seng ba kan pynieng da u Bah AL Hek namar ha baroh 2 sien ki ilekshon MP ba la dep um shym la ioh lad ban iakhun ia kitei ki ilekshon bad kumta mynta ka kynti kan long ka lad ba biang bha ia u ban mih ban aireng khamtam haba u dei ruh u Myntri ka Sorkar Jylla bad uba lah ban pyniadei bad baroh ki briew.Nalor kane, ki la pynpaw ba ka seng ka dei ruh ban phaikhmat sha u Bah Ernest Mawrie ban iakhun ia ka ilekshon MP namar ba udei u nongialam uba la trei shitom ban kyntiew ia ka BJP hapoh ka jylla Meghalaya bad kane ka seng mynta ka la lah ban suh thied ha kylleng ki bynta jong ka Meghalaya bad watla ula iehnoh ia ka kam President jong ka BJP Meghalaya hynrei u dang iai don bynta beit ban pynkhlain ia ka seng.Kine ki nongialam ki la ong, lada ka BJP ka ai tiket ia u kyrtong uba biang tam, ka don ka lad bha mynta ka kynti ka BJP ban sei ia u MP uba nyngkong eh na kane ka jylla ban mihkhmat sha Parliament khamtam haba ki paidbah ha ka jylla ki la sdang ban ieid bad shaniah ia ka BJP bad ia ki kam ki jam ba la theh da ka sorkar BJP ha ka jingialam u Narendra Modi ia ka jylla Meghalaya.

Ki la ong, ba kum ki nongialam jong ka seng ki ieh beit ha ka jingstad jong ki nongialam kiba ha khliehduh jong ka BJP ban shim ia ka rai kaba bha tam halor kane ka kam bad kin iai bteng ban trei shitom na ka bynta ka seng BJP.Kine ki nongialam kim shym la treh ban kren eiei pat ha kaba ia dei bad ka Kong Finela L Nonglait kaba la pan tiket ban iakhun ilekshon MP Lok Sabha.