Ka thain Tyrso, Umru ka Ri-Bhoi District kan sa pdiang shen ia ki sim kbeit ne Amul Falcon kiba ju wan sah kai sha katei ka thain naduh ka 15 tarik eiei u Risaw haduh u Naiwieng. Ka Tyrso Valley Wildlife Protection Society (TVWPS) ka la ju pyllong ia ka tamasa sim kbeit ne Amul Falcon Festival ha katei ka thain, shi bynta ban pynneh ia kane ka jinglong kyrpang katei ka jaka bad ban iada ia ki sim ki doh, na ka jingwan sah kai ki sim kbeit.U President ka Society u bah Alos Nongpoh u la ong ba ka Society mynta u snem ka la don ka jingthmu ban pyllong biang ia kane ka tamasa ban khring ia ki nongwankai ha kane ka jaka.U la ong ba ka jingpyllong ia kane ka tamasa kan long ruh kum shi bynta ban pynneh pynsah ia katei ka jinglong kyrpang ka jingwan ki sim kbeit ha kane ka shnong.
Kane ka Society ka la sdang ia kane ka tamasa naduh u snem 2015, ban phah ia ka khubor sha ki paidbah ba ym dei ban pyniap ban pynmynsaw ia ki sim ki doh. Katkum ka jingiathuh u bah Alos, la ong ba ha shwa ban mih ka aiom khriat ne ka aiom tlang kine ki sim kbeit man u snem nna kylleng ki jaka u ju ialum khrui ha kane ka jaka.“Ka jingwan kine ki sim kbeit ka la iarap ia ki nongrep namar ba ki puh ki bam ia ki khniang kiba pynduh ia u kba u khaw,”ula ong. U la iathuh ba ha katei ka sngi, ki kbeit ki leit wad jingbam ruh kylleng ka jylla Meghalaya shaduh Smit, sha Mawsynram, bad kiwei ki jaka bad ynda janmiet kila wan phai biang sha jaka ba ki iashong wat haduh ka por 7 baje mynmiet ruh ki dang wan bad ki tip thik thik ha ka jaka ba ki iasah khlem da iakhleh bad kiwei ki kynhun.
U bah Alos u la iathuh ba kine ki sim kbeit ki don bun kynhun bha bad kawei pa kawei ka kynhun kam duna ia ki 80 hajar haduh 1 lak tylli ki sim kbeit. U bah Alos u la iathuh ba ka Society ka kwah ba ka sorkar kan pynrung noh ha ka almanak jongka, ia kane ka tamasa sim kbet khnang ban kyntiew ia ka kam jngohkai bad kawei ka long ban pynneh pynsah ia katei ka jaka.
