U president ka Meghalaya Pradesh Congress Committee (MPCC) u Bah Vincent Pala u la pyntip ba u Lamphang ka iingdorbar thawain u la pdiang ia ka jingujor ka seng Congress pyrshah ia ki 3 ngut ki MLA ba pyniasoh sha ka National People’s Party (NPP). Haba kren sha ki lad pathai khubor u Bah Pala ula ong, ki ujor sha ka ophis u Lamphang ka iingdorbar bad u Lamphang ula pdiang ia ka jingujor bad mynta ula pan jingmut na u Advocate General ka Jylla. Ula iathuh ka Congress ka la ai jingujor ar tylli pyrshah ia ki 2 ngut ki MLA ba la shah Sospon namar ha ka 16 Nailar, 2 ngut ki MLA ki khlem wan ha ka jingialang ka MPCC.
“Kawei ka jingujor ka dei pyrshah ia u MLA ka Umsning u Dr Celestine Lyngdoh, namar watla ula wan ha ka jingialang ha ka 16 tarik hynrei ha ka 19 tarik Nailar baroh 3 ngut ki la rung sha ka NPP” la ong u bah Pala bad bynrap ha ka shithi ba ki phah sha ka MPCC, ki 3 ngut ki MLA ki la kam ba ki la dep ban ai ka jingtyrwa ban leit iasoh sha ka NPP ha ka 14 tarik Nailar bad ki la leit ia soh ha ka 19 tarik Nailar. U President ka MPCC u la ong, ka Congress ka la pynbiang lut ia ki jingdonkam, ki kot ki sla bad la phah ruh sha ka iing kashari.
U Bah Pala ula iathuh ia ki jingujor la leh da ka AICC bad ka kamram jong ka MPCC ka dei ban iarap ia ki jingdonkam. “Ia ki jingujor la leh ha ka 9 tarik Nailur bad 16 tarik Nailar bad ka Congress ka la ujor ia ki 3 ngut ki MLA da kaba pule lang ia ka kyndon Sections Para 2.1A jong ka 10th Schedule jong ka Constitution of India 1950” u la ong.
