U Myntri Kam Pohiing bad Cooperation jong ka Sorkar Pdeng, Amit Shah u la peit bniah ia ka jingpyntreikam ia ka “Vibrant Villages Programme” ha ka jingialang ha New Delhi mynta ka sngi. Ha kane ka jingialang, u Myntri Kam Pohiing jong ka Sorkar Pdeng u la ong ba ka Sorkar India hapoh ka jingialam jong u Myntri Rangbah duh, Narendra Modi, ka ieng shem ban kyntiew ia ki shnong khappud jong ka ri ha baroh ki liang. U Shah u la ban jur halor ka jingdonkam ban plie ki lad ioh kam na ka bynta ki nongshong shnong jong ka thain bad kyntiew ia ki lad jingpyniasoh ban iada ka jingmih ki briew na kine ki shnong khappud. U Amit Shah u la ong ba dei ban pynshlur ia ki Central Armed Police Forces (CAPF) bad ki shipai kiba don ha kylleng kine ki shnong khappud ba kin thied ia ki mar rep ba don ha ka thain bad ki tiar shna kti lyngba ki cooperative. U la ong ba ki lad jingsumar jong ki shipai bad ki CAPF dei ban pynbiang na ka bynta ka jingmyntoi jong ki nongshong shnong ha ki shnong ba marjan. U Myntri Kam Pohiing bad Cooperation jong ka Sorkar Pdeng, Amit Shah u la ban jur halor ka jingpyndonkam pura ia ka bording solar bad kiwei kiwei ki tyllong ba lah ban pynthymmai kum ka lyer bad kiwei kiwei.
U Myntri Kam Pohiing u la bthah ban bteng ia ki sienjam jong ki myntri bad ki ophisar ban sngewthuh kham bha ia ki jingeh jong ki shnong khappud hapoh ka Vibrant Villages Programme. Haduh mynta, la pynlong palat 6000 tylli ki prokram ha kine ki shnong khappud, ba kynthup kumba 4000 tylli ki kam ai jingshakri bad ki awareness camp. La sanction palat 600 tylli ki projek da ka sorkar India na ka bynta ki lad ioh kam ha kine ki shnong. Ha kane ka jingialang, u Myntri Kam Pohiing u la ban jur halor ka jingpeit bniah kaba man ka por ban pynbeit ia ki jingeh ba dang sahteng. Hapoh ka skhim ‘Vibrant Villages Programme’, 136 tylli ki shnong khappud ki la ioh haduh 113 tylli ki projek ba dei bad ka surok ha ka jinglut kaba T. 2,420 klur. La pyntreikam ruh ia ka connection 4G ha kine ki jaka bad shuwa u bnai Nohprah 2024, baroh ki shnong hapoh ka Vibrant Villages Programme kin ioh ia ka network 4G. La shim ia ki sienjam ban pynthikna ka jingkynthup ia baroh ha ki kam pisa ha baroh kine ki shnong bad ka India Post-Payment Banks (IPPB).
Ka kam ka dang iaid ban kyntiew ia ki jaka jngoh kai ban pynitynnad ia kine ki Vibrant Village bad kyntiew ia ka kam jngoh kai. Ha kane ka kam, la kyntiew ia ka bor treikam bad ki jingdon jingem kiba iadei bad ka kam jngoh kai ha ka jingiatreilang bad ka tnad Kam Jngoh Kai. Hapoh ka jingialam jong u Myntri Rangbah Duh, Narendra Modi, kane ka skhim kaba kongsan ka dei kaba la sdang ha ka 14 tarik u Rymphang, 2023 ha kaba la mang T 4800 klur. Ha kane ka jingialang la wan iashim bynta da ki ophisar jong ka tnad Kam Poh Iing ba kynthgup u Secretary ka Tnad Kam Poh Iing jong ka Sorkar Pdeng, Secretary, Border Management bad Director General, Indo Tibetan Border Police (ITBP).
