Phah jingthoh ka VPP ban buh nongpynkylla ktien ia ka jingkren u Lat ha Iing Dorbar

Ka Voice of the People’s Party ka la phah da ka jingthoh sha u Lamphang ka ïing dorbar thawaiñ ka jylla u Thomas Sangma bad dawa ba lada u Lat ka jylla u ai jingkren (Governor Address) ha ka ktien Hindi, dei ban buh ia ki nongpynkylla ktien na ka bynta ka jingbit jingbiang jong baroh kiba don bynta ki bym sngewthuh ia ka Hindi. Ha ka shithi ba la phah da u Bah Heavingstone Kharpran uba long u Secretary, VPP Parliamentary Party ula pynpaw ba ka Dorbar Mang Tyngka ka long kaba kongsan bad kumta ka long kaba donkam ia baroh ki dkhot jong ka iing dorbar ba kin sngewthuh shai ia ka rukom pyniaid ia ka dorbar.

 “La sakhi ha ka dorbar ba la dep, u Lat ka jylla ula ai jingkren da ka ktien Hindi hapoh ka dorbar kaba la pynmih jingeh bakhraw ia ki dkhot bym sngewthuh ia ka ktien Hindi bad khamtam da kaba buh jingmut ba ka Hindi kam dei satia ka Official Language jong ka Meghalaya” la pynpaw u Bah Kharpran ha ka shithi. “Ha kaba iadei bad katei ka mat, na ka liang ka Voice of the People Party ka pynpaw da ka burom ia ka rai ba la shim ha ka jingialang jong ka Parliamentary Party ha ka 30 tarik u Kyllalyngkot ban kyntu ka jingkren u Lat ka dei ban long ha ka ktien English bad lada u Lat ym lah ban ai jingkren ha ka English, ka ophis dei ban pynbiang ia u Translator ha ka por ba ai jingkren u Lat na ka bynta ka jingbha bad ka jingbiang baroh kiba don bynta” la ong u Bah Kharpran.

 Ula bynrap ba dei ban pynthikna ka jingpyniaid ia ka Dorbar Mang Tyngka ka dei ban kren da ka ktien kaba sngewthuh lang baroh ki dkhot ia kaba yn lah ban batskhem ia ka nongrim jong ka jingkhuid jingsuba, ka jingkynthup lang bad ka jingai jingshakri ba paka. “Ka seng ka kwah ban pynpaw shai kdar ia ka nongrim ba ka ieng, ba kan ym lah ban iadon bynta ha ka dorbar, lada ka Assembly secretariat ka pulom ban shim khia ia kane ka mat” la pynkut u nongialam ka VPP.