Ki nonghikai ka skulbah North Eastern Hills University (NEHU) kynthup ka North Eastern Hills University Teacher Association (NEHUTA) bad ka Meghalaya Tribal Teacher Association (MeTTA-NEHU) hynne ka sngi ki la phah tuklar ha u Lat ka Jylla u CH Vijayashankar ban pynkut noh ia ka jingiakhih hapoh ka skulbah. Lah ban kdew ba ka skulbah NEHU ka dang don hapdeng ka jingiakhih, ha kaba ki samla pule kila iaid palat 72 kynta ka jingshah thngan khlem pud sngi bad kila khang khyrdep ruh iaka skulbah baroh kawei. Haba kren sha ki lad patahi khubor u President ka NEHUTA u Prof Lakhon Kma u la iathuh ba ha ka jingiakynduh bad u Lat ka Jylla, ki nonghikai ka skulbah kila pynpaw ia ka jingsngewkhia halor ka jingiakhih shah thngan khlem pud sngi kaba dang iaid ha NEHU daki samla pule. U Prof Kma u la iathuh ba naka liang u Lat ka Jylla ruh u la pynpaw ka mynsiem ba sngewdiaw halor ka kynrum kynram kaba dang iai bteng ha NEHU.
U la iathuh ba u Lat ka Jylla u la bthah ia ki nonghikai bad ia baroh ki nong bynta ha NEHU ba kin aiti ia la ki jong ki jong ki jingai jingmut kumno ban pynkut noh ia ka kynrum kynram ha NEHU.”U Lat ka Jylla u sngewkhia halor ki kynrum kynram ha NEHU bad u la pynpaw ba ki samla pule kidei ban don haki kamra Class ym ba kin iakhih” la ong u Prof Kma. Ha kaba iadei bad ka jingdawa ban hiar shuki noh ia u VC, u Prof Kma u la ong Ki samla pule, ki nonghikai bad ki Non-Teaching Staff jong ka North Eastern Hills University (NEHU) ki la duh jingshaniah ia u Prof PS Shukla ban bteng kum u Vice Chancellor jong ka NEHU.
U Prof Kma u la ong ba ki nonghikai kim shym la wan ban iakynduh ia u Lat ka Jylla ban weng noh ia u VC hynrei ki la wan tang ban iathuh halor ki jingjia kiba dang iaid ha ka skulbah. U la ong ba ki samla pule ki don ka hok ban dawa na u VC ban hiar shuki namar naduh ka sngi kaba nyngkong jong ka jingiakhih u VC um shym la leh ei ei ne um shym la shim khia ban weng ia ki jingeh jong ki samla pule, ki nonghikai ne ki bym dei ki nonghikai.
