Phaikhmat ki paitbah sha ka kam jngohkai pyrthei hadien ka jingshah khang tih dewiong: Shylla

U Myntri ka tnat Revenue and Disaster Management, u Bah Kyrmen Shylla u la ong ba ka jingkhang jong ka National Green Tribunal (NGT) ia ka jingtih dewiong hapoh ka Jylla ha u snem 2014 ka la wanrah ia ka jingkylla ha ka rukom pyrkhat pyrdain jong ki paitbah ha kaba mynta ki la phaikhmat bha sha ka kam jngohkai pyrthei kum ka lad kamai jakpoh.
U Bah Shylla u la kren ia kane haba kren kum u kongsan ha ka jingplie ia ka Ranikor Beach Festival, 2024 ba ar sngi kaba la pynlong da ka Officer’s Club, South West Khasi Hills District hapoh Pamdaba River Beach, Ranikor kaba hap hapoh Ranikor Civil Sub-Division kaba la sdang mynta ka sngi.
Haba ai jingkren kum u kongsan, u Bah Shylla u la ong, “Hashwa jong u snem 2014, ki briew hapoh jong ka East Jaintia Hills kim tip bad kim sngewthuh eiei shaphang kata ka kam jngohkai pyrthei namar ba ka long ka jaka kaba riewspah bha ha ka jingdon u dewiong, hynrei hadien ka jingshah khang noh ia ka jingtih dewiong, ki paitbah ki la sngewthuh ba u dewiong un ym neh sah shi junom bad ki la pyrshang ban wad ia ki lad ki lynti kumno ban kamai jakpoh man ka sngi. Ngi la trei shitom ha kine ki khyndiat snem bad ngan iathuh ia phi ba mynta hapoh East Jaintia Hills ngi don ki jaka jngohkai pyrthei kiba ki kali bad ki nongwan jngohkai ki hap ban ieng lain bad ap bun kynta tang ban ioh rung namar ka jingwan jong ki nongwan jngohkai pyrthei na kylleng”.
Kumta, u Bah Shylla u la kyntu jur ia ki paitbah ba kidei ban pynkylla noh ia ki jingmut jingpyrkhat bad ban sngewthuh ruh ba ka kam jngohkai pyrthei ka long kawei na ki lad kamai ja kpoh na ka bynta ki babun ki samla khlem kam khlem jam. U la kyntu ruh ia ki briew ba kidei ban long kiba kylluid mynsiem ban pdiang sngewbha ia ki briew kiba wan napoh ka Jylla bad shabar ka Jylla khnang ba ka kam jngohkai pyrthei kan kiew shaphrang.
Na ka liang jong u MLA ka Ranikor, u Bah Pius Marwein u la iathuh ba ka jingthmu jong ka jingpynlong ia kane ka beach festival ka long nyngkong eh ban kyntiew ia ki kam jngohkai pyrthei bad kumjuh ruh ban ailad ia ki samla napoh ka thain ba kin pyni ia la kijong ki sap ki phong ha ki babun ki bynta ba kane ka festival ka plie lad na ka bynta jong ki kum ka rynsan.
Ha kajuh ka por u Bah Pius u la kyntu ruh ia ki paitbah nongshong shnong jong ka thain Ranikor ba kidei ban sumar sukher bha ia ka Wah Kynshi bad ki sawdong sawkun jong ka, da kaba kiar na ka jingpyniap pathar ia ki dohum dohwah namar ba lada ngi lah ban pynneh pynsah ia kane ka Wah, kan long ka jingkyrkhu kaba khraw na ka bynta ki paitbah ka thain lyngba ka jingwan jong ki nongwan jngohkai pyrthei na kylleng ki jaka.
Ia kane ka Beach Festival la pynphuh pynphieng da ki jingialehkai ba bun jait, ki jingtem na ki kynhun tem ba pawnam hapoh ka Jylla, ki DJ na shabar ka Ri, ki Beach Queen Contest, Dance Troupe (The Bellas Dance Crew), Fashion Show lem bad kiwei kiwei.