Ka jingïalang pynkup burom ïa ki hynñiew ngut ki samla kiba la pass bha na ka shnong Tyrso Nongkyllep kaba hap hapoh Mawhati konstitwensi, la lah ban ïoh sngew ïa ki tien sneng bad kraw ïa ki samla bad kumjuh ïa ki kmie ki kpa lyngba ki nongshah khot sngewbha. Ha katei ka sngi ki samla kiba la shah pynkup burom ki don haduh hynñiew ngut kiba kynthup ïa u Rishan sten, Anando sten, Kyrshan sten, Dapyrkhatbha kahit, Iowan I mujai, Enekson masynting bad Jenita masharing bad ki dei ruh tang kine ki khynnah kiba la ïakhun ïa kane ka eksamin matrik na katei ka shnong bad ïa kane ka jingpynkup burom la pynlong da ka dorbar shnong hapoh ka jingïalam u bah Mathias Mujai kum u rangbah shnong bad u bah Pynsuk Sten kum u secretary.
Ha katei ka sngi ki la bun ki nongkren bad napdeng kine ki kynthup ïa u Bah James Sylliang Ex MDC kum u Kongsan bad u Bah Kyrmenlang Uriah, Editor In Chief U Shillong Mail kum u Symbud Kongsan.
Na ka liang u bah James u la kren halor ka jingdonkam jong ki khun samla ba kin long kiba phikir haba ki mih na la shnong bad ba kim dei ban shah hiar thma ha u drugs uba la pynjot ïa ka jingim jong kiba bun ki khun samla hapoh ka Ri Khasi. Katba na ka liang u bah Kyrmen u la kren ba kumno ki samla ki donkam ban tip ïa ka jingïoh ïa ka jingstad bad ban ong ha kitei ki samla ba ïa ka jingstad, kin lah ban ïoh dei dei tang lada ki minot bad kohnguh ïa ki jinghikai naduh na ïing, ka jaka pule bad haduh ha shnong.
Sa kawei ka mat kaba u la pynsngew ka long, ba ki samla ki dei ban tip ïa ka jingeh kaba ka ri Khasi ka ïakynduh kaba ym don jingpher na u khniang jingpang Cancer bad ban ong ba ïa une u khniang jingpang dang lah ban sumar namar um pat bam lut kumta ïa mynta kin dei ki samla ki ban hap ïakhun ïa kane ka jingpang da kaba long khlaiñ ha ka nongrim, ka jingmut jingpyrkhat bad ha kiwei ki liang.
Shuh shuh, na ka liang u bah Kyrmen u la kyntu ïa ki kmie ki kpa kiba dei ki nongrep, ba kin pynshlur ïa ki khun samla ban leit pule ban iit jingstad ha kaba ïadei bad ka kam rep khnang kan long ka jingmyntoi ïa ka kam jongki kaba la bsa ïa ka ïing ka sem wat ruh kaba lah ban ban phah pule ïa ki khun sha ki skul bad haduh ha kolej. U la bynrap ruh ban ong, ba kumba ka long, ka pyrthei ka la kylla kumta donkam ruh ban pynkylla ruh ïa ka rukom pyrkhat ha kiba bun ki liang.
