Uwei na ki nongshad ba tbit ha ka jylla u Steve Jyrwa, phra sien kynthih u la kamai 100 percent ha ka iakob shad ba la tip kum ka India Best Dancer 4 kaba ju pyni ha Sony Live. Ha ka jingshad kaba hynnin ka sngi U Blei kaba dei ka sien kaba phra ruh u la kamai 40 poin, kaba dei ka poin bapura ba ju ai ia ki nongshad kiba ki nongbishar ne ki judge ki ai haba ki itynnat ia ka shad jong ki. Hashuwa kane baroh hynniew sien lynter u la kamai beit full point kaba 30 bad hynnin ka sngi U Blei ka dei ka sien kaba phra.
U Steve u la shad ia ka challenge ba la ai da u Dharmesh, uba dei uwei na ki nongshad uba la kylla long u nonghikai shad ne choreographer, uba la iaroh ia ka jinglah ban shad bha jong u Steve. Ka jingitynnat palat ka jingshad jong u haduh ka la pynlong ia u Punit, sa uwei u nongshad bad u Choreographer ba un ai sngewbha syndon da ka baje remdor ia u Steve ha kane ka sngi.
Kumba shu kdew u Steve Jyrwa u dei uba shong basah ha Nongmynsong bad ka jingtbit shad jong u, ka la pynlong ia ka jaitbynriew ba kan sngewsarong haba ia dei bad kane ka sap kaba u don kaba u la pyni ha ka jingshad jong u. Ym lah ban len, u tbit shisha une u khynnah, naba baroh ki nongbishar, naduh ka Gita Maa (Gita Kapur), kaba ki ju khot ieit, ka Karishma Kapoor, ka puron bapaw ha ka Bollywood, khamtam ha ki por mynshuwa bad u Terence Lewis ki la iaroh bha ia ka jingtbit shad jong u.
