Ki nongtuh ha kine ki sngi ki la jyllei ha ki shnong ki thaw bad wat ha ki iingmane ba la tip kum ki iing ba kyntang ruh kim salia shuh ban tuh. Kane ka la jia ha ka Balang Presbyterian Umdihar, Ri Bhoi District hynnin ka sngi 17 tarik Jymmang por shiteng miet ki runar nongtuh bym lah ban ithuh durkhmar ki la phrongtuh ha iingmane da ka plie jubor ia ka jingkhang iit ban rung shapoh bad leh dusmon ia ki tiar kyntang jong ka Jingiaseng bad rong tuh ia ka pisa kynshew, ki khiew syntiew bad katto katne ki tiar ba pyndonkam na ka bynta ki jingiaseng kyrpang. Halor kane ka jingjia, ki nongialam ha ryngkat ki nongkitkam ka Committee Balang Presbyterian Umdihar ba kynthup naduh ki Rangbah, ka Jingiaseng Kynthei bad CE Society, ki la iam pait dohnud bad kthang mynsiem namar ka jingiai bteng jingshah tuh bad pynjot ia ka Iingmane ha ka Shnong Umdihar kam dei shuh ka sien nyngkong bad mynta ka dei ka sien basaw ba ka Iingmane ka pynjor bad lute ha ki runar.
Ha kren sha ki Nongthoh Khubor u Bah R B Shadap u wei na ki Rangbah Balang ka Jingiaseng Presbyterian Umdihar, u la iathuh ba kum ka Jingiaseng hi baroh kynthup naduh ki Rangbah Balang, Ki Tymmen Basan, ka Jingiaseng Kynthei bad CE Union, ki dap da ka jingsngew sih kthang halor kane ka jingjia shah rong tuh bad ka jingshah leh dusmon ki tiar ki tar bad ka iing mane hi ba la leh da ki runar ki bym lah ban ithuh satia.
U la iathuh ruh, ba kum kane ka jingjia phrong tuh hapoh kane ka iingmane kam dei shuh ka sien ba nyngkong hynrei la iai jia na kawei ka por sha kawei ha ki snem ba la leit noh hynrei kum ka Balang hi ka shu sngap ia kine baroh hynrei dei ha kane ka kynti ba ki dkhot ka balang Kim lah shuh ban shu sngap bad kumta la rai ban aiti sha ka Dorbar Shnong ban leh ia kaba donkam ban ai sha ki bor ka ain da kaba ujor ejehar halor kane ka jingjia.
U Bah Shadap u la iathuh ruh, ba ki runar bym lah ban ithuh ki phrong jubor shapoh ka iingmane ha ki por shiteng miet bad ki la rong noh ia ka pisa ba la lum kynshew ha ki jingiaseng, ki khiew syntiew ba rem dor, ki la pynjot ruh ia ki tiar tem jong ka CE Union bad ruh ban rah ia ki tiar kyntang ba ju pyndonkam ha ki jingiaseng kyrpang. Na ka liang ka Balang hi ka shaniah mynta ha ka jingstad jong ka Dorbar Shnong Umdihar ban leh ia kaba donkam.
