Plie basa die doh u MP ha Iawmuksow Mowkaiaw

Ka Iawmuksow ba don ha ka shnong Mowkaiaw, West Jaiñtia Hills District dei ka iew ba la rim bha kaba la sdang naduh u snem 1957, katba nangiaid ki por ka la nangheh nangiar bad kumba long mynta ka la don 370 tylli ki basa ba kynthup naduh ki basa die mar bam, die jaiñ sopti, basa die ia ki tiar pyndonkam ha ïing bad kiwei pat ki tiar ki mar ba bun jait.

Ha ka jingiaid lynti kane ka iew, hynne ka sngi ka la long ka sngi ban sah  kynmaw namar ba ka dorbar Iawmuksow Mowkaiaw ka la lah ban plie ia ki basa die doh ba la shna kyrpang ha ka rukom bakhuid lyngba ka mang pisa ba T.9,60,000 tyngka.

Na kane ka mang pisa ba T. 9,60,000, ki la ioh jingiarap T. 7,00,000 na u Vincent H Pala MP Lok Sabha lyngba ka Members of Parliament Local Area Development Scheme MPLADS bad T. 2,60,000 pat la pynlut na ka dorbar Iawmuksow Mowkaiaw.

Ha kane ka sngi plie paidbah ia ki basa die  doh la wan ban plie da u MP Lok Sabha u Vincent H Pala hi, ryngkat ka jingdonlang u MDC ka thaiñ u Winning G Sungoh, u BDO ka Laskeiñ Block u B.Niang, ki dkhot ka dorbar Iawmuksow Mowkaiaw, kiba shah khot sngewbha bad kiwei.

U Vincent H Pala haba kren ula kyntu iaki nongdie nongthied ban pynneh iaka jingkhuid ki basa die doh  kumjuh  ka iew hi baroh kawei, khnang ban hun mynsiem ki paidbah haba bam iaki mar bam kumjuh ki doh ba thied na kane ka iew.

Haba iaroh iaki bor pyniaid  kane ka iew u ong, haka jingiaid lynti jong u kylleng kylleng u iohi ba ki briew ynda da ioh pisa  ioh skhim ki tur  ban iaknieh, hynrei ha kane ka iew pat u iohi iaka jingpher ka rukom pyniaid, kata nalor ba ki lah ban pyniaid haka rukom ba long khuid long shai, kane ka iew kala don bynta ruh ban synniang ai jingiarap kylleng wat sha ki skul, ki balang bad kiwei ba donkam jingiarap.

Kumta u ngeit skhem ba kin dang bteng shuh shuh iaki kam ba bha, bad naka liang ki nongmihkhmat paidbah ruh haba ki iohi iaka jingiaid shakhmat ka kam bad biang ka  rukom pyniaid u ong ba ki shlur shuh shuh ban ai jingiarap.

U Winning G Sungoh haba kren ula banjur halor ka jingdonkam ban pynneh iaka khuid ka suba ka iew khamtam haki basa die doh,  u ong ruh donkam ban pyrkhat iaka jaka Bret ñiut  ba biang ba paka, bad la dei ka  por iaki shnong ba marjan ban iatreilang halor kane ka bynta  khnang ban ym mih kano kano ka huri hura hadien habud da kaba ai nuksa iaka  Iawmusiang ha Jowai.

Halor ka jingdawa  ban pynioh kali kit ñiut ha kane ka iew u Winning G Sungoh ula kular ban ai  tangwa donkam ban  ioh shwa iaka jaka bret ba paka.

Naka liang u BDO ka Laskeiñ Block u B.Niang ula ai jingmut iaki bor pyniaid iew kumjuh ki bor shnong ban iatreilang bad ka sorkar naka bynta ka jaka bret ñiut,  kumjuh ruh naka bynta ban pynbha pynmiat iaka iew lyngba ka skhim shispah sngi katkum ba bor ba shah ka aiñ.

Haka jingialang ba pyniaid da u Chairman ka Iawmuksow Mowkaiaw u P.Shadap, u  Secretary u Pynbiangmi Laloo ula iathuh iaka khana lyngkot ka iew, bad la ioh ruh ka jingkren na u waheh shnong Mowkaiaw u Shaniah Lamare.