Ka Indian Institute of Management Bangalore (IIMB) ka la pyllait ia ka prokram ai jinghikai na ka bynta ki undergraduate ia kaba lah ban leh lyngba ka online ba kane ka jinghikai kadei shaphang ka Digital Business and Entrepreneurship, kaban sdang naduh u bnai Nailur 2024. Ia kane ka sienjam treikam, ia kaba la wanrah lyngba ka IIMBx kaba long ka rynsan pule digital ka IIMB, ka jingwanrah ia kane ka jingpule ka pynpaw ia ka jingpyniar ia ki jingai jinghikai ha kaba iadei bad ki jingpule ha ka kyrdan undergraduate. Ka jingpule ia ka Bachelor of Business Administration (BBA) kaba lai snem, ba la lam pyniaid da U Prof. Suresh Bhagavatula, kan don lang ha ka ia ka jinghikai ia ki digital technology, kumjuh ruh ia ki jinghikai shaphang ka jingpyniaid ia ki kam khaii pateng, bad ka jingtbit ha ka liang ka seng kam seng jam ne entrepreneurial skills. Ka jingthmu jong kane ka jingpule ka long ban pynlong ia ki samla pule ba kin don ia ki jingtip bad ki iktiar kiba donkam na ka bynta ba kin lah ban iakhun ha ki kam khaii pateng, da kaba wanrah ia ki jingtyrwa ban leh ia ki internship ne ban pyrshang ia ka jingtreikam bad kumjuh ruh ban shah ia ki samla ba kin leh ia ki projek khnang ba kin ioh ban mad ia ki jaitkam bad ki jingtrei kiba kum ba long ha ka pyrthei. Ka jingpawnam jong ka IIM Bangalore ha kaba iadei bad ka jingbha ha ka rukom ai jinghikai bad kaba long ruh kum ka nonglam khmat ha ka Massive Open Online Courses (MOOCs) mynta la nang kham pynjanai shuh shuh da kaba pynmih ia kane ka prokram ai jinghikai. U Professor Rishikesha T Krishnan, Director jong ka IIMB, U la pynpaw ia ka rukom saindur ia kane ka jingpule, kaba kynthup ia ka test na ka bynta ban ioh rung sha klass bad ka jingbuh ia ki kyndon kiba suk na ka bynta ki nongpule ban mih noh na ka jingpule. “La saindur ia kane ka prokram ban pynmih ia ki samla pule graduate kiba lah ban pynrung ia ki rukom treikam digital na ka bynta ki kam khaii pateng kiba la ju leh baroh shi katta ban wanrah ia ki jingkylla ne ban long ki nongseng kam seng jam ha ka liang ka digital,” u la ong.
Kawei na ki bynta ba kyrpang jong kane ka prokram ka long ba ka iahap bad ka jingangnud ne ka thong jong ka India na ka bynta ka lawei ban wan, kaba thmu ban kyntiew ia ka jingrung sha ki jaka pule ne Gross Enrolment Ratio (GER) ha ki jingpule kiba heh khnang ba yn lah ban weng ia ki jingeh kiba iadei bad ka pule puthi da kaba plie lad ia ki samla pule ban ioh pule, bad ai ia ki jinghikai kiba iahap bad ka jingdawa jong ki karkhana treikam. Ha ka jingpyniaid ia ka jinghikai la buh lang ia ki jingpule kiba iadei bad ki bynta ba kongsan ha ka liang ka digital bad management ne ka jingpyniaid ia ka kam, khnang bay n lah ban sei ia ki samla pule graduate kiba tbit ha ka liang ka digital. Kane ka prokram ba la pynmih ka long kaba iahap bha bad ka jingdawa ia ki samla kiba tbit ha kane ka liang kum ha Guwahati, ha kaba ka don ka jingdawa kaba jur na ka bynta ki nongtrei kiba tbit ha ka liang ka digital. Katba ka kam khaii pateng ha Guwahati ka la nang kiew bad bun na ki kiba la sdang ban kylla sha ka digital, kumta ka donkam bhai a ki samla pule graduate kiba tbit ha ka liang ka ban pyniaid ia ki kam khaii pateng katkum ka digital bad kiba tbit ha ki kam lajong. La khmih lynti ba kane ka sienjam treikam ia kaba la wanrah da ka IIMB kan iarap ban long kum kawei na ki bynta ban pynduna ia ka jingkyrduh ia ki briew kiba tbit, bad kaban iarap ia ki kam khaii pateng ki trai ri da ki buit treikam thymmai, bad ha ka liang ka digital.
Nalor kane ka jingai jinghikai kaba biang ba bit bha, lyngba ka BBA programme yn iarap ban pyniasoh ia ki samla pule bad ki jaka treikam bad ban iatreilang ruh lyngba ki projek bad ki rynsan bapher bapher, da kaba tyrwa sha ki samla ia ki kabu ba kin lah ban iashim bynta bad kiwei pat ki para ba ia pule lang bad kumjuh ruh bad ki nongialam ha ki karkhana bapher bapher. Kane ka rukom treikam ka pyntikna ba kine ki samla pule graduate kin long kiba la pynkhreh ba kin lah ban ialeh pyrshah ia kino kino ki jingeh ha kaba iadei bad ka khaii pateng ha ka liang ka digital bad noh synniang ruh ban kyntiew ia ka iew kum ha Guwahati. Ka IIM Bangalore, ka wan ha ka kyrdan ba sha khlieh bha ha kaba iadei bad ki jaka pule management ha India, bad ka iai bteng ban wanrah ia ki buit bad Iad treikam thymmai ha ka liang ka pule pithi. U Prof. Vasanthi Srinivasan, Chairperson of Digital Learning ha IIMB, u la ban jur ba ka rukom pynwan ia ka prokram bad ka jinglah ban iaphylliew jingmut hapdeng iwei bad iwei pat, kaba kynthup ia ka video na ki nonghikai, ka jingpule, ka jingpule ia ki kot ki sla, ka jingai ia ki kam ba ki samla ki dei ban pyndep ne ki assignment, bad ki projek, ban pyntikna ba ki samla pule kin ioh ia ka jinghikai kaba bit ba biang bad kaba ma ki ruh ki lah ban iashim bynta ha ki rukom bapher bapher.
