Ka Myntri ka Koit ka Khiah ka jylla ka Dr M. Ampareen Lyngdoh hynne ka sngi, ka la plie ia ka First Referral Unit (FRU) ha Mawphlang Community Health Centre (CHC). Haba kren ha ka jingialang, ka Kong Ampareen ka la ban jur ia ka jingdonkam ban shaniah ia ki hospital sorkar bad ki dei ban buh sharud ban niew ba ki long kiba hapoh bad ka la ban jur ruh ba ka sorkar ka don ia ka thong ban pynbiang ia ki jaka sumar kiba bit ba biang ban iajan bad ki iing ki sem kiba don ha nongkyndong.
Ka Myntri sorkar kala ong, ba la nang kyntiew ia ka Mawphlang CHC ha ka jingdon ia ki tiar ki tar ai jingsumar, la thung ia 5 ngut ki nongai jingsumar, uwei u Specialist, 3 ngut ki doktor bniat bad uwei u doktor Ayush bad kane ka jakasumar mynta ka lah ban 39 tylli ki medical test, kaban pyllait ia ki nongshong shnong ha nongkydong ban leit shaduh sha nongbah Shillong.
Ka Myntri kala kyntu ia ki paid nongshong shnong ban pynrung kyrteng ha ka Meghalaya Health Insurance Scheme (MHIS) bad ban pyniasoh lang ia u Aadhaar ban ioh ei ia ka jingsumar bad kala pynshlur ban don ia ka jingiatreilang ban pynlong ia ka Mawphlang CHC kum ka jaka ai jingsumar kaba don burom bad kala kyntu ia ki nongshong shong ba kidei ban leit mardor sha ki jaka ai jingsumar haba ki pang ki shitom. Ha kane ka jingplie ia ka First Referral Unit la iadonlang u MLA ka Mawphlang u Bah MB Kurbah, ki ophisar sorkar bad kiwei kiwei.
