U Prof. (Dr.) Nalin Mehta, Director ka NEIGRIHMS, hynne ka sngi u la plie ia ka machine Hyperthermic Intraperitoneal Chemotherapy (HIPEC) na ka bynta ban ai jingsumar ia kiba pang bampong ne Cancer. U Prof. (Dr.) Nalin Mehta ula ong ba ka NEIGRIHMS ka la kiew shaphrang ban ai ia ka jingsumar ia kiba nongpang Cancer, ha kaba ki paidbah ka thain kin ioh lad ban shah sumar mynta ban ia kaba ki leit phah sumar shabar jylla. Katba u Medical Superintendent Dr. Daniala C, ula ong ba ka NEIGRIHMS ka ialeh ban ai ia ka jingsumar kaba bha tam ia ki nongpang Cancer ha ka thaiñ shatei lammihngi.
U Surgical Oncologist u Dr Caleb Harris ula ong, ka rukom treikam jongka HIPEC kadei kaba la pyndonkam ha kaban pynrung ia ki dawai kiba la pynkhluid ha ka kpoh na ka bynta ban ai iaka jingsumar ka bha bad ka HIPEC kadei kaba ai jingmyntoi bha na ka bynta ka jingsumar kaba paka ha ka chemotherapy. Ka dei ka jingsumar kaba la leh tang shisien hapoh jongka kamra ai jingsumar, ha ka jaka ban leh bunsien ia ka jingai jingsumar kiba iaid haduh katto katne taiew bad 90% na u dawai u don hapoh kpoh bad kumta ka pynduna ia ka jingktah jong ka jaboh na ka Chemotherapy ha ka met baroh kawei.
Ia ka HIPEC la lah ban pyntreikam pura da ka NEIGRIHMS kham mynshwa bad mynta haba kane ka hospital kala ioh ia ki tiar ki tar kiba paka khnang ba kan ai jingmyntoi ia bun ngut ki nongpang bad kane ka lad kadei ka jingkyrmen ia ki nongpang kiba don ia ka jingpang Cancer, ha kaba ka jingsumar ka long tang ban pynjem ia ka jingpang.
