Ban pynsah ia ka nam ka burom jong ki saw ngut ki nongialam ka Raij Namdong kiba la khlad noh na sla pyrthei ba kynthup ia u (L) Phidalis Lyngdoh, (L) Seberius Sungoh, (L) Hariwel Myria bad (L) Elias Susngi, hynne ka sngi na ka liang ka Raij ka la plie da u mot sah jingkynmaw na ka bynta jong ki ha Shnong Namdong A, West Jaintia Hills District.
Ha kane ka sngi plie ia u mot sah jingkynmaw u MDC ka thaiñ u Dawan Lyngdoh ula long kum u kongsan ryngkat ka jingdonlang u Daloi ka Elaka Nongjngi u Copius Daw, u Acting Waheh Raij Namdong u Lambor Lyngdoh, ki Waheh Shnong jong 12 tylli ki Shnong kiba hap hapoh ka Raij Namdong ba kynthup naduh u Waheh Shnong Namdong B, u DS War, Waheh Shnong Namdong A, u Arki Sumer bad kiwei nalor ki ryngbah ki longkmie, ki samla bad kiba haïing hasem kitei ki nongialam bala khlad.
Kiba ai jingkren ha kane ka sngi ba kynthup naduh u kongsan u Dawan Lyngdoh, u Dolloi Copious Daw, ki waheh shnong waheh Raij bad kiwei kila pyrto iaki kam ba khraw jong kine ki nongialam bala khlad noh, ba haka por jong ki katba lah kila pyrshang ban trei bha iaka kam naka bynta ka jingmyntoi u paid ka Raij haki liang bapher bapher.
Kumta ki khmih lynti ba ki nongialam ba mynta kin nanglah ban trei kham bha shuh shuh.
Ha ka jingialang ba pyniaid da u Chairman ka Raij u Linus Pale, la ioh iaka khana lyngkot samoi treikam kitei ki nongialam Raij bala khlad na u Aicydol Pakma uba dei ruh u General Secretary ka Raij, ka jingkren na u Tbn Arnes kassar, na u Rio Pulang, na u Asst. Secretary Raij u Apostol Shadap.
Bad la ioh ruh ka jing shad na ki longkmie bad samla ka shnong Namdong A, bad ruh ka jing rwai bad shad naka kur Susngi.
