Ka Khasi Hills Autonomous District Council (KHADC) hynne ka sngi, ka la ai da ka kamra ia ki khlieh nongsynshar ba kin ioh ban pyndonkam haba ki wan sha KHADC. Ia kane ka kamra treikam la plie bad aiti da u Chief Executive Member (CEM) ka KHADC u Bah Pyniaid Sing Syiem sha ki khlieh nongsynshar ha kaba la iadonlang u Chairman ka KHADC u Bah Lamphrang Blah, u Deputy CEM u Bah PN Syiem, ki Syiem, ki Lyngdoh bad kiwei kiwei kiba dei ki Khlieh Nongsynshar kiba hap hapoh u pud u sam jong ka KHADC.
U CEM ula pynpaw ba kane ka kamra kadei kaba la ai ban iarap ia ki Syiem, ki Lyngdoh, ki Sordar, ki Sirdar bad ki Wahadadar ba kin pyndonkam haba ki wan donkam ha ka ophis treikam jongka KHADC bad ula ong ba kane kadei ka sien kaba nyngkong ba ka Council kan ai da ka kamra treikam ia ki Khlieh Nongsynshar bad kan dei kaei kaei kaban sah jingkynmaw.
U Bah Pyniaid ula ong, ba ka jingbuh ia kane ka Ophis kadei kaba la leh da ka jingthmu ban pynkhlain ia ka jingiadei hapdeng ka KHADC bad ki Khlieh Nongsynshar jong ki Hima bad Elaka, bad pynthikna ia ka jingiatreikam kaba iajan ha ki snem kiban dang wan.
Ka Council kala buh ruh ia iwei i nongtrei ban iarap ia ki khlieh nongsynshar ha katei ka kamra. Ki khlieh Nongsynshar kila ai khublei ia u CEM ka KHADC bad ia ka Executive Committee halor kaj ingai ia katei ka kamra kaba ki lah ban pyndonkam haba ki wan ban pyndep ia ki kam ki jam hapoh ka District Council.
