Plie u Conrad ia ka KV Grid Substation ha Phulbari West Garo Hills

U Myntri Rangbah ka Jylla u Conrad K Sangma u la leit ban plie paidbah ia ka 2×50 MVA, 132/33 KV Grid Substation hapoh ka shnong Phulbari West Garo Hills District.

Ha kane ka sngi la don lang ka MP ka Tura ka Agatha K Sangma, u Myntri ka tnat bording u A.T Mondal, u Myntri ka PHE u Marcuise N Marak, u Myntri ka tnat ialehkai u Bah Shakliar Warjri bad ki Nongmihkhmat jong ka Meghalaya Power Transmission Corporation Limited, MPTCL.

Haba kren ha kane ka sngi u Conrad ula ong ba kane kadei ka sngi sngi sah jingkynmaw ia ka thain da ka jingplie paid bah ia ka project 2×50 MVA, 132/33 KV Grid Substation kaba kongsan bha.

“Ka jingwanrah ia ka Sub-Station ba heh duh ha ka thain West Garo Hills kan wanrah ia shibun ki jingkylla. Ha ki snem bala leit noh, wat hapdeng ka jingioh bording, ngi ju mad ia ka jingeh ba rit palat ka voltage hynrei da ka jingplie ia kane ka substation ba thymmai, ka thain jong ngi kan ioh ia ka voltage kaba long kumjuh bad kiwei ki thain ka Jylla” la ong u Conrad.

Naka liang u Myntri ka tnat bording u A.T Mondal ula ong ba kane ka Projek ka long kaba donkam bha iaka thain naka bynta ban khmih iaka jingsam bording.

“Da ka jingplie ia kane ka substation, ngin sa lah ban pyndap ia ka jingdawa bording jong ka West Garo Hills khlem kano kano ka jingthut shuh. Kane ka dei ka jingai sakhi ia ka jingkut jingmut jong ka Sorkar ban wanrah jingkylla ha ka jingsam bording hapoh ka thain” la ong u A.T Mondal.

Ha kane kajuh ka sngi, u Myntri Rangbah ula buh mawnongrim ruh ban tei ia ka Indoor Stadium ha JP Higher Secondary School, Bholarbhita, West Garo Hills bad la pynpaw ka jingsngewnguh, u dala ba ai khublei ia u Myntri ka tnat ialehkai ba lah ban pynioh haduh T.9 klur ban tei ia ka Gallery bad ka madan phlang plastic (Artificial Turf), kaban synniang shibun ia ka jingroi ki kam ialehkai hapoh ka thain