U Myntri Rangbah ka Jylla u Conrad K Sangma, hynne ka sngi u la plie paidbah ia ka jingtei ba pynkup dur itynnad ia ka IGP Point mar pyrshah ia ka ophis Superintendent of Police (SP) ha Shillong. Kane ka jingtei thymmai ha IGP Point kan long ruh kum ka jaka ap kali, jaka shongkai ki paidbah kiba iaid lyngba kane ka jaka. Ia kane jaka la shna pynbha da ka tnat Pynroi Sor bad ka Assembly bad ka thong ka dei ban pynkylluid ia ka rukom iaid kali ha kane ka thain. Ha kane ka sngi la don lang u Symbud Myntri Rangbah ka Jylla u Sniawbhalang Dhar, DGP Kong Idashisha Nongrang lem bad kiwei ki heh Ophisar ka Sorkar Jylla. Haba kren ha ka jingialang, u Myntri Rangbah ula ong ba watla ka jingshna ia ka jingtei pynitynnad ka dei ha ka jaka kaba rit, hynrei ka dei pat ka sienjam halor ka jingpyrshang ban pynkup dur thymmai ba itynnad ia ka nongbah Shillong bad pyntip ba bun ki jaka kin sa mih kum kine ki jingtei.
“Ka long kaba kongsan ia ngi ban pynthikna ba ngin pyndonkam ia baroh ki jaka ba lait ha ka lynti kaba dei bad ba don jingmut” ula ong. U Myntri Rangbah ula pyntip ruh ba ka Sorkar kala dep rai ban tei ia ka 4 star Hotel ha Orchid Polo bad ka jingtei kan sa sdang noh shen.“Ngi la pyrshang ban pyndonkam kat kaba lah ia ki nongkynti bad ki jaka ba ka Sorkar ka don bad ha kine ki 12 bnai ban wan la khmih lynti ba kan don ka jingkylla dur kaba khraw ha nongbah Shillong” ula ong. U Myntri Rangbah ula pyntip ruh ba ka Integrated Command Centre ka la don ha ka bynta ba khatduh ban pyndep bad yn sa plie noh shen ia ka.
Kiba iadonlang ha kane ka jingialang ki kynthup ia u Symbud Myntri Rangbah Bah Sniawbhalang Dhar bad kiwei kiwei ki heh Ophisar. Hadien kane, u Myntri Rangbah bad ki heh ki hain kila iaid na kane ka jaka sha Secretariat da kaba pyndonkam ia ka walkway.
