U Vice-Chancellor ka CAU Imphal u Anupam Mishra ula plie ia ka Techno Incubation Centre (TIC) for Jackfruit Processing ha ka College of Community Science, Tura. Ia ka TIC la shna lyngba ka Mission Jackfruit ba dei ka mission ba la pyntreikam da ka Directorate of Food Processing, Meghalaya da ka jingthmu ban pynkylla ia u sohphan, kum u mar ba lah ban pyndonkam ha ki bynta bapher bapher ka ban pynkhlain ia ka lad kamai kajih ki nongrep bad ki nongseng kam lajong. Ïa kane ka TIC la dei ban plie da u Myntri Rangbah ka jylla u Conrad Sangma, hynrei namar ka jingbym lait kumta la plie noh da u Anupam Mishra ha kaba la iadonlang u Deputy Commissioner ka ka West Garo Hills u Jagdish Chelani, u Officer on Special Duty, Directorate of Food Processing, Meghalaya B Mylliemngap, u Dean jongka College of Community Science u Dr. Jyoti Vastrad, ki heh ki haiñ, ki nongrep bad ki nongsengkam lajong bad kiwei kiwei.
Haba ai jingkren lyngba ka Video Conferencing u Conrad K Sangma ula ong, ba kane kadei kawei na ki projek kaba kongsan na ka bynta ki paidbah ka thain bad ka Technology Incubation Centre (TIC) ka dei ka bynta kaba heh jong ka Mission Jackfruit bad ula ong, kane ka projek ka don ia ka jingthmu ban ai jinghikai bad ki lad ki lynti ha kajuh ka por ban kyntiew ruh ïa ka jingpynmih ia ki mar na u Sohphan kaban long ka lad kamai ia ki nongrep bad ki nongseng kam lajong. Katba u Jagdish Chelani ula ïaroh ïa ka jingshimkhia jong u Dean bad ka College of Community Science, Tura hi baroh kawei kaba la lah ban pynpoi ia kane ka sien jam sha ki nongrep bad ki nongseng kam lajong bad ula ong ba u sohphan u don ia ki Nutrients kiba bun jait bad udei u soh uba don ia ka dor bad ka TIC kan ai jingshakri ïa ki paidbah khamtam eh ïa ki nongseng kam lajong kiba pyndonkam ia u sohphan.
U DC ula ong, ba ka jylla Meghalaya kadei kaba shaniah bha ha ka rep ka riang bad kala pynmih ia u sohtrun, sohniamtra, shynrai kiba bha tam hynrei ka jingpynmih ia kine pat ka long kaba duna bha, kumta dei ban shim ia ki sienjam ban ialeh ban kyntiew ha kaban pynmih bun ia kine ki mar. Ha kane ka jingialang, la pyllait ruh ia ka kot lyngkdop jong ka Techno Incubation Centre for Jackfruit Processing bad kala don ruh ka jingpyninam na ka ICAR, KVK na baroh ka rilum Garo bad ki nongsengkam lajong kiba pyndonkam da u Sohphan.
